મુખ્ય હાઇલાઇટ્સ:
- ગંભીર સમસ્યા: અમરેલીના ઐતિહાસિક કામનાથ ડેમમાં ગાંડી વેલનું મોટું સામ્રાજ્ય ફેલાયું.
- રોગચાળાનો ડર: પાણી દૂષિત થવાથી અને મચ્છરજન્ય રોગચાળો ફેલાવવાની આશંકાથી સ્થાનિકો ચિંતિત.
- ધાર્મિક સ્થળ પર અસર: કામનાથ મહાદેવ મંદિર પરિસરમાં પણ સ્વચ્છતાને લઈને જોખમ વધ્યું.
- તંત્ર સામે આક્રોશ: ગાંડી વેલ તાત્કાલિક હટાવવા માટે તંત્રને વારંવાર રજૂઆત છતાં કામગીરીનો અભાવ.
- લોકમાગણી: જવાબદાર વિભાગ દ્વારા વહેલી તકે સફાઈ ઝુંબેશ હાથ ધરવામાં આવે તેવી માગ.
ઐતિહાસિક મંદિર અને જળાશયની આસપાસ પ્રદૂષણ વધતા તંત્રની કામગીરી સામે સ્થાનિકો દ્વારા ઉગ્ર માગણી
અમરેલી શહેરમાં આવેલા પૌરાણિક શ્રી કામનાથ મહાદેવ મંદિર પરિસર અને તેની બાજુમાં આવેલ કામનાથ ડેમ હાલ ગંભીર સમસ્યાનો સામનો કરી રહ્યો છે. ડેમમાં ચારેબાજુ ‘ગાંડી વેલ’નું સામ્રાજ્ય ફેલાઈ ગયું છે. આ વેલ દિન-પ્રતિદિન નદીમાં આગળ વધી રહી છે, જેના કારણે જળાશયનું પાણી દૂષિત થઈ રહ્યું છે. આ સમસ્યાના કારણે સ્થાનિકોમાં ફફડાટ વ્યાપી ગયો છે અને તંત્ર દ્વારા તાત્કાલિક ધોરણે આ વેલ દૂર કરવાની માગણી કરવામાં આવી છે.
સ્થાનિક રહીશોના જણાવ્યા અનુસાર, જો સમયસર આ વેલ દૂર કરવામાં નહીં આવે તો ડેમનું પાણી સંપૂર્ણપણે પ્રદૂષિત થઈ જશે. વધુમાં, આ ગાંડી વેલને કારણે ડેમ વિસ્તારમાં મચ્છરોનો ઉપદ્રવ ખૂબ જ વધી ગયો છે. પાણી સ્થિર થવાને કારણે અને વેલના કારણે મચ્છરજન્ય રોગચાળો ફેલાવવાની પ્રબળ ભીતિ સેવાઈ રહી છે. કામનાથ મહાદેવ મંદિર એ શ્રદ્ધાળુઓનું આસ્થાનું કેન્દ્ર છે અને મોટી સંખ્યામાં લોકો અહીં દર્શન માટે આવે છે, ત્યારે ડેમની દુર્દશા જોઈને લોકોમાં ભારે રોષ જોવા મળી રહ્યો છે.
પર્યાવરણ પ્રેમીઓ અને સ્થાનિક લોકોનું માનવું છે કે, આ સમસ્યા અત્યારે પ્રાથમિક તબક્કે છે, પરંતુ જો તંત્ર દ્વારા બેદરકારી દાખવવામાં આવશે તો તે આવનારા સમયમાં મોટા રોગચાળાને નોતરું આપી શકે છે. નદીના શુદ્ધિકરણ અને ડેમમાં જામેલી આ વેલને દૂર કરવા માટે જવાબદાર અધિકારીઓ વહેલી તકે સ્થળ તપાસ કરી યોગ્ય નિકાલ લાવે તેવી લોકમાગણી જોર પકડી રહી છે. અત્યાર સુધી તંત્રના પેટનું પાણી હલ્યું ન હોવાની ફરિયાદ પણ સ્થાનિકો કરી રહ્યા છે.
અહેવાલ.મહેશભાઈ જળું
About the Author
