મુખ્ય હાઇલાઇટ્સ:
- પીસીબીની સફળ રેડ: ઘાટલોડિયાની ભાગ્યોદય સોસાયટીના પાર્કિંગમાંથી લાખોનો વિદેશી દારૂ જપ્ત.
- ચાર આરોપીઓની ધરપકડ: રાજસ્થાન અને અમદાવાદના ચાર શખ્સો રંગેહાથે ઝડપાયા.
- મોટો મુદ્દામાલ: કાર સહિત ૯.૬૩ લાખથી વધુનો મુદ્દામાલ પોલીસ દ્વારા કબજે.
- સ્થાનિક પોલીસ પર સવાલો: પોશ વિસ્તારમાં દારૂના વેપલા સામે સ્થાનિક પોલીસની આંખ આડા કાન કરવાની નીતિ ચર્ચાનો વિષય.
- ફરાર આરોપીઓની શોધખોળ: રેડ દરમિયાન ફરાર થયેલા ત્રણ મુખ્ય આરોપીઓને પકડવા પોલીસે તજવીજ હાથ ધરી.
અમદાવાદ શહેરના ઘાટલોડિયા જેવા પોશ વિસ્તારમાં સ્થાનિક પોલીસની નિષ્ક્રિયતા સામે ફરી એકવાર ગંભીર સવાલો ઉઠ્યા છે. ઘાટલોડિયામાં ફાઇવ પેટલ્સ હોટલ સામે આવેલી ભાગ્યોદય સોસાયટીના પાર્કિંગમાં પીસીબી (PCB) ની ટીમે આકસ્મિક રેડ કરીને લાખો રૂપિયાના વિદેશી દારૂના જથ્થા સાથે ચાર શખ્સોને રંગેહાથે ઝડપી પાડ્યા છે. સ્થાનિક પોલીસની જાણ બહાર આટલો મોટો દારૂનો વેપલો કેવી રીતે ધમધમતો હતો, તે અંગે હવે ચર્ચાઓનો દોર શરૂ થયો છે.
સોસાયટીના પાર્કિંગમાં ચાલતું હતું દારૂનું નેટવર્ક
પીસીબીની ટીમને મળેલી ગુપ્ત બાતમીના આધારે પોલીસે ઘાટલોડિયા વિસ્તારમાં તપાસ હાથ ધરી હતી. તપાસ દરમિયાન ભાગ્યોદય સોસાયટીના પાર્કિંગમાં દારૂનો મોટો જથ્થો ઉતારવામાં આવી રહ્યો હોવાનું સામે આવ્યું હતું. પોલીસે તાત્કાલિક ત્રાટકીને દારૂની હેરાફેરીમાં સંડોવાયેલા કૌશલ જગમાલ અહારી, અનિલકુમાર નાનજી ડામોર, શુભમ વિનોદભાઈ વોરા અને ગુલાબ ગોપાલજી ડાભીને દબોચી લીધા હતા. આ કાર્યવાહીમાં દારૂના જથ્થા સાથે એક કાર પણ જપ્ત કરવામાં આવી છે, જેની કુલ કિંમત ૯.૬૩ લાખ રૂપિયાથી વધુ હોવાનું જાણવા મળે છે.
ફરાર આરોપીઓની શોધખોળ તેજ
પોલીસની પ્રાથમિક પૂછપરછમાં આ નેટવર્કમાં અન્ય ત્રણ મુખ્ય સૂત્રધારો રવિ પ્રધાનજી ઠાકોર, અર્જુન ઠાકોર અને સુરેશભાઈના નામ સામે આવ્યા છે. આ ત્રણેય આરોપીઓ ઘટનાસ્થળેથી ફરાર થઈ જવામાં સફળ રહ્યા હતા, જેમને પકડવા માટે પોલીસે ચક્રો ગતિમાન કર્યા છે. ખાસ કરીને રાજસ્થાનના ડુંગરપુર અને ઉદયપુરથી દારૂનો જથ્થો અમદાવાદ સુધી પહોંચાડવામાં આ ગેંગ સંકળાયેલી હોવાનું તપાસમાં બહાર આવ્યું છે.
સ્થાનિક પોલીસની કામગીરી શંકાના દાયરામાં
ઘાટલોડિયા વિસ્તારમાં પોલીસ ચોકીઓ અને સતત પોલીસ પેટ્રોલિંગ હોવા છતાં, સોસાયટીના પાર્કિંગ સુધી દારૂનો જથ્થો પહોંચી જાય અને ત્યાંથી તેનું વિતરણ પણ શરૂ થઈ જાય તે સ્થાનિક પોલીસની કામગીરી સામે અનેક સવાલો ખડા કરે છે. દારૂના આ કૌભાંડમાં સ્થાનિક પોલીસની રહેમનજર હોવાની ચર્ચાએ વિસ્તારમાં ભારે આક્રોશ જગાડ્યો છે. શું ઉચ્ચ અધિકારીઓ આ મામલે ઘાટલોડિયા પોલીસની ભૂમિકાની તપાસ કરશે? તે જોવું રહ્યું.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
