મુખ્ય હાઇલાઇટ્સ:
- દેશભરમાં પ્રથમ ક્રમ: ધોળકા તાલુકાની સરકારી ઈગોલી પ્રાથમિક શાળાએ ‘સ્વચ્છ અને હરિત વિદ્યાલય મૂલ્યાંકન ૨૦૨૫-૨૬’ માં ભારતભરમાં પ્રથમ સ્થાન મેળવ્યું.
- મહા મુકાબલો: દેશની ૧૦.૪૭ લાખથી વધુ અને ગુજરાતની ૪૩ હજારથી વધુ શાળાઓ વચ્ચે ઈગોલી શાળાએ બાજી મારી.
- ૧૦૦ ટકા ગુણ મેળવ્યા: સ્વચ્છતા, પીવાનું શુદ્ધ પાણી, શૌચાલય સુવિધા અને પર્યાવરણ સંરક્ષણના તમામ માપદંડોમાં શાળાએ ૧૦૦ માંથી ૧૦૦ ગુણ પ્રાપ્ત કર્યા.
- સિદ્ધિઓનો ઇતિહાસ: શાળા અગાઉ ૨૦૨૧-૨૨ માં રાષ્ટ્રીય સ્તરે ચોથા ક્રમે અને રાજ્યમાં પ્રથમ ક્રમે રહી ચૂકી છે.
- ટીમવર્કની સફળતા: શાળાના આચાર્ય ધીંશુ પ્રજાપતિએ આ ભવ્ય સફળતાનો શ્રેય વિદ્યાર્થીઓ, શિક્ષકો અને ગ્રામજનોના અવિરત સહયોગ અને જનભાગીદારીને આપ્યો.
અમદાવાદ જિલ્લાના ધોળકા તાલુકાની સરકારી ઈગોલી પ્રાથમિક શાળાએ શૈક્ષણિક જગતમાં નવો ઈતિહાસ રચીને સમગ્ર દેશમાં ગુજરાતનું નામ રોશન કર્યું છે. ભારત સરકારના શિક્ષણ મંત્રાલયના ડિપાર્ટમેન્ટ ઓફ સ્કૂલ એજ્યુકેશન એન્ડ લિટરેસી દ્વારા વર્ષ ૨૦૨૫-૨૬ ના ‘સ્વચ્છ અને હરિત વિદ્યાલય મૂલ્યાંકન’ ના પરિણામો જાહેર કરવામાં આવ્યા છે. આ રાષ્ટ્રીય કક્ષાના મૂલ્યાંકનમાં ઈગોલી પ્રાથમિક શાળાએ અસાધારણ પ્રદર્શન કરીને દેશભરમાં પ્રથમ ક્રમ હાસલ કરવાનું ગૌરવ મેળવ્યું છે.
૧૦ લાખથી વધુ શાળાઓ વચ્ચે તમામ માપદંડોમાં ૧૦૦ ટકા ગુણ
આ રાષ્ટ્રીય કક્ષાની પ્રતિષ્ઠિત સ્પર્ધામાં દેશભરની સરકારી, ખાનગી, કેન્દ્રીય અને સૈનિક શાળાઓ સહિત કુલ ૧૦,૪૭,૮૫૯ જેટલી શાળાઓએ ભાગ લીધો હતો, જેમાં એકલા ગુજરાતની જ ૪૩,૫૨૭ શાળાઓ સામેલ હતી. આ ચુસ્ત સ્પર્ધા અને આકરા મૂલ્યાંકનમાં ઈગોલી પ્રાથમિક શાળાએ સ્વચ્છતા અને પર્યાવરણ સંરક્ષણના તમામ માપદંડોમાં ૧૦૦ ટકા ગુણ મેળવીને દેશની અન્ય શાળાઓ માટે એક ઉત્તમ ઉદાહરણ પૂરું પાડ્યું છે. ત્રીજા પક્ષ દ્વારા થયેલી ચકાસણીમાં શાળામાં પીવાનું શુદ્ધ પાણી, સ્વચ્છ શૌચાલય, સાબુથી હાથ ધોવાની આધુનિક વ્યવસ્થા તેમજ “મિશન લાઈફ” અંતર્ગત થતી પર્યાવરણીય પ્રવૃત્તિઓની વિશેષ સરાહના કરવામાં આવી છે. આ રાષ્ટ્રીય ગૌરવપૂર્ણ પરિણામોમાં સ્થાન મેળવનારી કુલ ૧૯ શાળાઓમાં ગુજરાતની શાળાઓ સૌથી મોખરે રહી છે, જે રાજ્યના શિક્ષણ વિભાગ માટે ગર્વની બાબત છે.
અગાઉ પણ સ્વચ્છતા ક્ષેત્રે મેળવી છે અનેક રાષ્ટ્રીય-રાજ્ય કક્ષાની સિદ્ધિઓ
ઈગોલી પ્રાથમિક શાળા અગાઉ પણ સ્વચ્છતા રેટિંગમાં અગ્રેસર રહી ચૂકી છે. વર્ષ ૨૦૧૭ થી ૨૦૧૯ દરમિયાન ‘સ્વચ્છ વિદ્યાલય પુરસ્કાર’માં શાળાએ અનુક્રમે ૯૧ અને ૯૭ ના સ્કોર સાથે જિલ્લા કક્ષાએ ત્રીજો અને પ્રથમ ક્રમ પ્રાપ્ત કર્યો હતો. ત્યારબાદ, વર્ષ ૨૦૨૧-૨૨ માં ૯૯ ના સર્વોચ્ચ સ્કોર સાથે આ શાળા જિલ્લા અને રાજ્યમાં પ્રથમ તેમજ રાષ્ટ્રીય કક્ષાએ ચોથો ક્રમ મેળવીને દેશભરમાં જાણીતી બની હતી. આ વર્ષે ૧૦૦ માંથી ૧૦૦ ગુણ મેળવીને શાળાએ પોતાની શ્રેષ્ઠતા સાબિત કરી દીધી છે.
જનભાગીદારી અને ટીમવર્કનું આ ઐતિહાસિક પરિણામ: આચાર્ય
દેશભરમાં પ્રથમ ક્રમ મેળવીને રાષ્ટ્રીય સ્તરે રોલ મોડેલ બનવા બદલ ઈગોલી પ્રાથમિક શાળાના આચાર્ય ધીંશુ પ્રજાપતિએ ભારે આનંદ અને ગૌરવની લાગણી વ્યક્ત કરી છે. તેમણે આ ઐતિહાસિક સિદ્ધિ વિશે વાત કરતા જણાવ્યું હતું કે, ૧૦૦ ટકા ગુણ સાથેનો આ રેકોર્ડ શાળાના દરેક વિદ્યાર્થી, સમર્પિત શિક્ષકો અને સ્થાનિક ગ્રામજનોની જનભાગીદારીના અવિરત પરિશ્રમ તેમજ અદભુત ટીમવર્કનું પરિણામ છે. આ ગર્વની ક્ષણ ભવિષ્યમાં પણ શિક્ષણ અને સ્વચ્છતાની ગુણવત્તા જાળવી રાખવા માટે શાળા પરિવારને એક નવી ઊર્જા અને પ્રેરણા પૂરી પાડે છે.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
