મુખ્ય હાઇલાઇટ્સ:
- વાવણી પર અસર: રેલવેની અધૂરી કામગીરીને કારણે રસ્તાઓ બંધ થતા ખેડૂતો સમયસર વાવણી કરી શક્યા નહીં.
- ગ્રામજનોની મહેનત: વહીવટી તંત્રની નિષ્ક્રિયતા સામે ગ્રામજનોએ સ્વખર્ચે જેસીબી મંગાવી રસ્તો શરૂ કરાવ્યો.
- કાયમી ઉકેલની માંગ: શેડુભારથી જીરાખ્યા સુધી સીસી રોડ અને પાણીના નિકાલ માટે યોગ્ય વ્યવસ્થાની માંગણી.
- તંત્ર સામે આક્રોશ: અનેક વાર રજૂઆતો છતાં રેલવે વિભાગ દ્વારા સ્થળ મુલાકાત કે કામગીરી કરવામાં ઠાગાઠૈયા.
વહીવટી તંત્રની બેદરકારી અને ખેડૂતોનો સંઘર્ષ
અમરેલી જિલ્લાના શેડુભાર ગામમાં ચાલી રહેલો રેલવે પ્રોજેક્ટ સ્થાનિક ખેડૂતો માટે આશીર્વાદને બદલે મુસીબત બની ગયો છે. રેલવે લાઈનની અધૂરી કામગીરીને કારણે ખેડૂતોના ખેતર સુધી જવાના રસ્તાઓ બંધ થઈ ગયા છે. તાજેતરમાં થયેલા વરસાદને પગલે આ રસ્તાઓ પર કાદવ-કીચડનું સામ્રાજ્ય જામી ગયું હતું, જેને કારણે અનેક ખેડૂતો બે દિવસ સુધી પોતાના ખેતરોમાં પહોંચી શક્યા ન હતા. વાવણીના મહત્વના સમયે જ રસ્તો બંધ થઈ જતાં ખેતીના કામો ઠપ્પ થઈ ગયા હતા, જેથી ખેડૂતોમાં ભારે રોષ જોવા મળી રહ્યો છે.
સ્થાનિક સરપંચના પ્રતિનિધિ સુરેશભાઈ કુંભાણીએ જણાવ્યું હતું કે, રેલવે લાઈનને કારણે હજારો વીઘા જમીન કપાઈ ગઈ છે. વરસાદી પાણીના નિકાલ અને સુરક્ષા વ્યવસ્થાના અભાવે રસ્તાઓ પર માટી ભરાઈ જવાથી ટ્રેક્ટર જેવા ખેતીના વાહનોની અવરજવર અશક્ય બની હતી. તંત્ર દ્વારા અનેક વાર રજૂઆતો કરવા છતાં કોઈ નક્કર કાર્યવાહી ન થતાં, અંતે કંટાળેલા ગ્રામજનોએ જાતે જ સ્વખર્ચે જેસીબી મંગાવીને રસ્તો ચાલવા લાયક બનાવવો પડ્યો હતો. હાલ ખેડૂતોએ તંત્ર પાસે રેલવે ટ્રેક નજીક પ્રોટેક્શન વોલ બનાવવા, વરસાદી પાણીના નિકાલની યોગ્ય વ્યવસ્થા કરવા અને શેડુભારથી જીરાખ્યા સુધી કાયમી સીસી રોડ બનાવી આપવાની માંગ કરી છે.
અહેવાલ : ફારૂકભાઈ બિલખિયા
About the Author
