મુખ્ય હાઇલાઇટ્સ:
- ધારી તાલુકાના ભાડેરથી લૂંઘિયા માર્ગ પર આશરે ૮ મહિના પહેલાં જ લાખોના ખર્ચે બનેલા પુલની કામગીરી સામે ગંભીર સવાલો.
- પુલના આરસીસી બાંધકામ પર લાકડાની સ્ટીક ઘસતાં જ સિમેન્ટ-કોંક્રિટનો ભાગ તૂટીને ભૂકો થઈ જતો હોવાના વિડીયો અને આક્ષેપો.
- આરએન્ડબી જિલ્લા પંચાયતના નાયબ કાર્યપાલક ઇજનેરની સ્થળ તપાસમાં કામગીરી નબળી હોવાનું પુરવાર; સંબંધિત એજન્સીને નોટિસ ફટકારાશે.
- ધારી-બગસરા વિસ્તારમાં વિવાદાસ્પદ એજન્સીઓ અને રાજકીય વગ સામે સવાલો; તમામ નવા પુલોના સેમ્પલ ટેસ્ટિંગની ઉગ્ર માંગ.
આઠ મહિનામાં જ પુલ કથળ્યો; આરસીસીનો ભૂકો થતાં ગુણવત્તા સામે રોષ
અમરેલી જિલ્લાના ધારી તાલુકાના ભાડેરથી લૂંઘિયા ગામ તરફ જતા માર્ગ પર તાજેતરમાં લાખો રૂપિયાના સરકારી ખર્ચે નિર્માણ પામેલા પુલના બાંધકામની ગુણવત્તા સામે લોકરોષ ફાટી નીકળ્યો છે. આશરે આઠ મહિના પહેલાં જ બનીને તૈયાર થયેલા આ પુલના આરસીસી (RCC) બાંધકામ ઉપર માત્ર એક લાકડાની સ્ટીક ઘસતાં જ સિમેન્ટ અને કોંક્રિટનો મોટો ભાગ તૂટીને ભૂકો થઈ જતો હોવાના ચોંકાવનારા આક્ષેપો સામે આવ્યા છે. અત્યંત ટૂંકા ગાળામાં જ પુલની આવી જર્જરિત હાલત થતાં વાહનચાલકો તેમજ સ્થાનિક નાગરિકોની સલામતી સામે મોટો પ્રશ્નાર્થ ચિહ્ન ઊભો થયો છે.
બિલોની મંજૂરી અને નબળા ટેકનિકલ માપદંડોની તપાસની માંગ
સરકારી નાણાંના ખર્ચે થતાં કામોમાં અધિકારીઓની દેખરેખ અને ગુણવત્તાની ચકાસણી અનિવાર્ય હોવા છતાં આ પુલના બાંધકામમાં મોટો ભ્રષ્ટાચાર થયો હોવાની સ્થાનિક સ્તરે ચર્ચા જાગી છે. ધારી-બગસરા પંથકમાં રાજકીય વગ ધરાવતી એજન્સીઓ દ્વારા નબળી કામગીરી કરાતી હોવાના પણ આક્ષેપો થઈ રહ્યા છે. સ્થાનિક રહીશોએ માગ કરી છે કે વપરાયેલી સામગ્રી, બાંધકામની પદ્ધતિ, ટેકનિકલ માપદંડો, ગુણવત્તા ચકાસણીના અહેવાલો અને કયા અધિકારીઓએ બિલો મંજૂર કર્યા છે તેની ઊંડાણપૂર્વક અને તટસ્થ તપાસ કરવામાં આવે.
માર્ગ-મકાન વિભાગ દ્વારા સ્થળ તપાસ; એજન્સીને નોટિસ આપવા કવાયત
આ સમગ્ર મામલે આરએન્ડબી (R&B) જિલ્લા પંચાયતના નાયબ કાર્યપાલક ઇજનેર પ્રશાંત કાજાવદરાએ ખુલાસો કરતાં જણાવ્યું હતું કે, “આ પુલનું કામ ગત ડિસેમ્બર મહિનાની આસપાસ કરવામાં આવ્યું હતું. સ્થાનિક રજૂઆતો બાદ અમે જાતે સ્થળ તપાસ કરી છે, જેમાં પ્રાથમિક રીતે પુલની કામગીરી નબળી હોવાનું જણાઈ આવ્યું છે. વિભાગ દ્વારા તાત્કાલિક ધોરણે સંબંધિત કોન્ટ્રાક્ટર કે એજન્સીને કારણદર્શક નોટિસ પાઠવી જવાબ માંગવામાં આવશે અને કાયદેસરની આગળની કાર્યવાહી હાથ ધરાશે.”
ધારી વિસ્તારના તમામ નવા પુલોના સેમ્પલ ટેસ્ટિંગની માંગ
ભાડેર–લૂંઘિયા માર્ગ પરના પુલની લોલમલોલ સામે આવ્યા બાદ ધારી તાલુકા અને આસપાસના વિસ્તારોમાં તાજેતરમાં બનેલા અન્ય તમામ પુલો અને રસ્તાઓની પણ ટેકનિકલ તપાસ કરાવવાની માંગ બુલંદ બની છે. સ્થાનિક લોકો માંગ કરી રહ્યા છે કે સંબંધિત ઉચ્ચ અધિકારીઓ દ્વારા બાંધકામના સેમ્પલ લઈને લેબોરેટરીમાં ટેસ્ટિંગ કરાવવામાં આવે, જેથી ભવિષ્યમાં કોઈ મોટી દુર્ઘટના અટકી શકે અને સરકારી નાણાંનો દુરુપયોગ કરનાર જવાબદારો સામે કડક દાખલો બેસાડી શકાય.
રિપોર્ટર અલીભાઈ ઝાંખરા
About the Author
