મુખ્ય હાઇલાઇટ્સ:
- રાજુલા તાલુકાના મોરંગી ગામે અંગત અદાવતમાં વૃદ્ધની છરીના ઘા ઝીંકી હત્યા કરાઈ.
- બનાવ અંગે ડુંગર પોલીસ સ્ટેશનમાં ભારતીય ન્યાય સંહિતાની કલમ ૧૦૩(૧) હેઠળ ગુનો નોંધાયો.
- ભાવનગર રેન્જ આઈજી અને અમરેલી એસપીની સૂચનાથી પોલીસે હાથ ધરી હતી ત્વરિત તપાસ.
- અમરેલી એલસીબી અને ડુંગર પોલીસે બાતમી અને ટેકનિકલ સોર્સના આધારે આરોપી રૂસ્તમ બેલીમને ગણતરીની કલાકોમાં ઝડપી લીધો.
મોરંગી ગામે અંગત અદાવતમાં વડીલ પર છરી વડે હુમલો કરી મરણતોલ ઈજા પહોંચાડાઈ
અમરેલી જિલ્લાના રાજુલા તાલુકાના મોરંગી ગામે અંગત અદાવતને લીધે હત્યાનો સનસનાટીભર્યો બનાવ સામે આવ્યો છે. તારીખ ૧૭ ઓક્ટોબર ૨૦૨૬ ના રોજ સવારના આશરે સાડા આઠ વાગ્યાની આસપાસ મોરંગી ગામના રહીશ ભીખુભાઈ નનુભાઈ સમા ગામમાં આવેલી નરશીભાઈની દુકાને બેઠા હતા. તે દરમિયાન ગામમાં જ રહેતા રૂસ્તમ રાજેભાઈ બેલીમ નામના શખ્સે જૂની અંગત અદાવતનું મનદુઃખ રાખીને ભીખુભાઈ સાથે અચાનક બોલાચાલી કરી હતી. બોલાચાલી દરમિયાન ઉશ્કેરાઈ ગયેલા આરોપીએ પોતાની પાસે રહેલી તીક્ષ્ણ છરી વડે ભીખુભાઈને સાથળના ભાગે મરણતોલ ઘા ઝીંકી દીધો હતો. ગંભીર ઈજાઓને કારણે ભીખુભાઈનું કરૂણ મોત નીપજ્યું હતું.
ડુંગર પોલીસ સ્ટેશનમાં કાયદેસરનો ગુનો નોંધાયો
બનાવ અંગે મૃતકના પુત્ર રમજાનભાઈ ભીખુભાઈ સમા (રહે. મોરંગી, તા. રાજુલા) એ ડુંગર પોલીસ સ્ટેશનમાં સત્તાવાર ફરિયાદ નોંધાવી હતી. જેના આધારે ડુંગર પોલીસે આરોપી રૂસ્તમ બેલીમ સામે ભારતીય ન્યાય સંહિતા ૨૦૨૩ ની કલમ ૧૦૩(૧) તેમજ જીપી એક્ટની કલમ ૧૩૫ મુજબ ગુનો નોંધી આગળની કાયદેસરની તપાસ હાથ ધરી હતી. ગંભીર ગુનાની ગંભીરતાને ધ્યાને રાખી ભાવનગર રેન્જ આઈજીપી આર. વી. અસારી, અમરેલી પોલીસ અધિક્ષક સંજય ખરાત અને મદદનીશ પોલીસ અધિક્ષક જયવીર ગઢવી દ્વારા આરોપીને તાત્કાલિક પકડી પાડવા ખાસ દિશાનિર્દેશો આપવામાં આવ્યા હતા.
એલસીબી અને ડુંગર પોલીસની સંયુક્ત ટીમે આરોપીને દબોચી લીધો
આદેશ મળતાં જ અમરેલી એલસીબી પોલીસ ઇન્સપેક્ટર સી. પી. વાઘેલા તેમજ ડુંગર પોલીસ ઇન્સપેક્ટર વી. એસ. પલાસાની સંયુક્ત ટીમે અલગ-અલગ દિશામાં તપાસ ચક્ર ગતિમાન કર્યા હતા. પોલીસે ચોક્કસ બાતમી અને ટેકનિકલ સોર્સનો ઉપયોગ કરીને ગણતરીની કલાકોમાં જ હત્યાના ગુનામાં સંડોવાયેલા આરોપી રૂસ્તમભાઈ રાજેભાઈ બેલીમ (ઉંમર વર્ષ ૪૦, રહે. પ્લોટ વિસ્તાર, મોરંગી, તાલુકો રાજુલા) ને ઝડપી પાડ્યો હતો. પકડાયેલા આરોપીને આગળની કાયદેસરની કાર્યવાહી અને તપાસ અર્થે ડુંગર પોલીસ સ્ટેશન સોંપવામાં આવ્યો છે.
આ સફળ કામગીરીમાં એલસીબી પીઆઈ સી. પી. વાઘેલા, પીએસઆઈ એમ. ડી. ગોહિલ, પીએસઆઈ જે. ડી. વાઘેલા, એએસઆઈ બહાદુરભાઈ વાળા, હેડ કોન્સ્ટેબલ ગોકળભાઈ, લીલેશભાઈ, જનકભાઈ, યુવરાજસિંહ વાળા તેમજ ડુંગર પીઆઈ વી. એસ. પલાસા અને સ્ટાફના વનરાજભાઈ, મધુભાઈ, ભરતભાઈ, કનુભાઈ અને જયદીપભાઈ સહિતના પોલીસ કર્મચારીઓ જોડાયા હતા.
અહેવાલ ભાવેશ વાઘેલા અમરેલી
About the Author
