મુખ્ય હાઇલાઇટ્સ:
- થાનગઢ તાલુકાના લાખામાચી ગામની સીમમાં અવારનવાર દેખાતા અને પશુઓનો શિકાર કરતા દીપડાથી ભારે દહેશત હતી.
- દીપડાની સક્રિયતાને કારણે સ્થાનિક ખેડૂતો અને પશુપાલકો ખેતરો તેમજ સીમ વિસ્તારમાં જતાં ભય અનુભવતા હતા.
- ગ્રામજનોની રજૂઆતને પગલે વન વિભાગે પાંજરું ગોઠવીને દીપડાને સલામત રીતે કેદ કર્યો.
- દીપડો પાંજરે પુરાતાં ખેડૂતો અને માલધારીઓમાં આનંદની લહેર ફેલાઈ; વન તંત્રનો આભાર માન્યો.
લાખામાચી ગામની સીમમાં દીપડાના આટાફેરાથી પશુપાલકો અને ખેડૂતોમાં ભય
સુરેન્દ્રનગર જિલ્લાના થાનગઢ તાલુકામાં આવેલા લાખામાચી ગામે છેલ્લા કેટલાક સમયથી દીપડાના ત્રાસથી ગ્રામજનો ભયના ઓથાર હેઠળ જીવી રહ્યા હતા. લાખામાચી ગામની સીમમાં અને આસપાસના રક્ષિત વિસ્તારોમાં દીપડો અવારનવાર આવી ચડતો હતો અને પશુપાલકોના મૂંગા પશુઓનો શિકાર કરતો હતો. સીમ વિસ્તારમાં દીપડાના સતત આટાફેરાના કારણે સ્થાનિક ખેડૂતો પોતાના ખેતરોમાં કામકાજ અર્થે જતાં અચકાતા હતા અને પશુપાલકો પણ પોતાના પશુઓને ચરાવવા વગડામાં લઈ જતાં ગભરાતા હતા.
વન વિભાગે પાંજરું ગોઠવીને દીપડાને કેદ કર્યો
દીપડાના કારણે ખેતી અને પશુપાલન પર માઠી અસર પડતાં અને કોઈ માનવ ભક્ષણનો બનાવ ન બને તે માટે ગ્રામજનો તેમજ સ્થાનિક અગ્રણીઓએ તાત્કાલિક ધોરણે વન વિભાગનો સંપર્ક કરી સમગ્ર પરિસ્થિતિથી માહિતગાર કર્યા હતા. વન વિભાગની ટીમે બનાવની ગંભીરતા સમજીને સ્થળ તપાસ કરી હતી અને દીપડાની નિયમિત અવરજવર વાળા માર્ગ પર વ્યૂહાત્મક રીતે પાંજરું ગોઠવી તેમાં મરઘા/બકરાનું બાઈટ મૂક્યું હતું. ગત રાત્રિ દરમિયાન દીપડો શિકારની લાલચે પાંજરામાં પ્રવેશતાં જ દરવાજો બંધ થઈ ગયો હતો અને દીપડો કેદ થઈ ગયો હતો.
દીપડો કેદ થતાં સીમ વિસ્તારમાં રાહત, વન વિભાગ દ્વારા આગળની પ્રક્રિયા હાથ ધરાઈ
સવારે દીપડો પાંજરે પુરાયો હોવાના સમાચાર મળતાં જ લાખામાચી ગામના ખેડૂતો અને પશુપાલકો મોટી સંખ્યામાં સ્થળ પર એકઠા થઈ ગયા હતા અને રાહતનો શ્વાસ લીધો હતો. ભયમુક્ત બનેલા ગ્રામજનો અને માલધારીઓમાં ખુશીનો માહોલ જોવા મળ્યો હતો. વન વિભાગની ટીમે પાંજરામાં કેદ થયેલા દીપડાનું પ્રાથમિક આરોગ્ય પરીક્ષણ કર્યું હતું અને તેને સુરક્ષિત રીતે ઊંડા જંગલ વિસ્તારમાં મુક્ત કરવાની તજવીજ હાથ ધરી હતી. સ્થાનિકોએ વન તંત્રની સમયસરની કામગીરી અને સતર્કતા બદલ આભાર વ્યક્ત કર્યો હતો.
અહેવાલ ફારૂક બિલખીયા અમરેલી
About the Author
