મુખ્ય હાઇલાઇટ્સ:
- શ્રી વિદ્યાગુરુ ફાઉન્ડેશન દ્વારા માત્ર બે વર્ષના ટૂંકા ગાળામાં નિર્માણ પામ્યું સુપર મલ્ટી સ્પેશિયાલિસ્ટ સંકુલ.
- કેશ બારી વગરની હોસ્પિટલમાં તપાસ, દવાઓથી લઈને જટિલ ઓપરેશન સુધીની તમામ સારવાર તદ્દન ફ્રી.
- દર્દીઓ ઉપરાંત તેમના સગા-સંબંધીઓ માટે પણ નિઃશુલ્ક ભોજન વ્યવસ્થા અને હોસ્પિટલમાં નર્સિંગ કોલેજ શરૂ કરાશે.
- કાર્ડિયોલોજી, ન્યુરોલોજી, એમઆરઆઈ અને સીટી સ્કેન જેવી સેવાઓ ઉપલબ્ધ થતાં દર્દીઓને મોટા શહેરોમાં જવામાંથી મુક્તિ મળશે.
મહાનગરોને ટક્કર આપે તેવું અત્યાધુનિક સંકુલ સાવરકુંડલામાં આકાર પામ્યું
અમરેલી જિલ્લાના સાવરકુંડલા ખાતે આરોગ્ય ક્ષેત્રે એક નવો સ્વર્ણિમ ઈતિહાસ રચાઈ રહ્યો છે. શ્રી વિદ્યાગુરુ ફાઉન્ડેશન સંચાલિત શ્રી લલ્લુભાઈ શેઠ આરોગ્ય મંદિર ખાતે મહાનગરોની હોસ્પિટલોને પણ ટક્કર આપે તેવું ૭૫,૦૦૦ સ્ક્વેર ફીટમાં વિસ્તરેલું અદ્યતન ‘વિશ્વાસ બિલ્ડિંગ’ સંપૂર્ણપણે તૈયાર થઈ ચૂક્યું છે. માત્ર બે વર્ષના અત્યંત ટૂંકા ગાળામાં આકાર પામેલા આ સુપર મલ્ટી સ્પેશિયાલિસ્ટ હોસ્પિટલ સંકુલનું ભવ્ય લોકાર્પણ પંચદેવના પાવન સાનિધ્યે પંચદેવ ઉપાસક પ પૂ મોરારીબાપુના પાવન હસ્તે આગામી ૮ જાન્યુઆરીના રોજ ધામધૂમથી સંપન્ન થશે. આ નવા સોપાનથી અમરેલી જિલ્લા સહિત સમગ્ર સૌરાષ્ટ્રના ગ્રામીણ અને શહેરી નાગરિકો માટે ઘરઆંગણે જ ઉત્કૃષ્ટ તબીબી સેવાઓના દ્વાર ખુલી જશે.
હૃદય, મગજ તેમજ અત્યાધુનિક ડાયગ્નોસ્ટિક સેવાઓથી સજ્જ થશે નવું સંકુલ
આ નવનિર્મિત સુપર સ્પેશિયાલિસ્ટ હોસ્પિટલમાં હૃદય રોગ (કાર્ડિયોલોજી), મગજ અને ચેતાતંત્ર (ન્યુરોલોજી) તેમજ બાળરોગ જેવા અત્યંત સંવેદનશીલ અને મહત્વના વિભાગો પૂર્ણ ક્ષમતા સાથે કાર્યરત થશે. આ ઉપરાંત હોસ્પિટલ પરિસરમાં જ એક અદ્યતન નર્સિંગ કોલેજ તેમજ એમ.આર.આઈ. અને સી.ટી. સ્કેન જેવી અત્યાધુનિક ડાયગ્નોસ્ટિક સેવાઓ પણ ઉપલબ્ધ બનાવવામાં આવી છે. તદુપરાંત સ્ટાફ અને વિદ્યાર્થીઓના માર્ગદર્શન માટે વિશાળ ‘ઘેલાણી સભાહગૃહ’નું પણ નિર્માણ કરાયું છે. પરિણામે, હવે ગંભીર બીમારીઓની સારવાર, ટેસ્ટ કે ઓપરેશન માટે સ્થાનિક દર્દીઓને રાજકોટ, અમદાવાદ કે સુરત જેવા મોટા શહેરો તરફ જવાની બિલકુલ જરૂર નહીં રહે.
કેશ બારી વગરની હોસ્પિટલ: સારવાર અને ભોજન તદ્દન ફ્રી
આ હોસ્પિટલની સૌથી મોટી અને પ્રશંસનીય વિશેષતા એ છે કે અહીં સમગ્ર પરિસરમાં કોઈ ‘કેશ બારી’ જ રાખવામાં આવી નથી. પ્રાથમિક તપાસ, દવાઓ, લેબોરેટરી ટેસ્ટથી લઈને જટિલથી જટિલ શસ્ત્રક્રિયાઓ (ઓપરેશન) માટે દર્દી પાસેથી એક પણ રૂપિયો લેવામાં આવતો નથી અને તમામ સારવાર સંપૂર્ણપણે નિઃશુલ્ક પૂરી પાડવામાં આવે છે. એટલું જ નહીં, દૂર-સુદૂરથી આવતા દર્દીઓ તેમજ તેમની સાથે આવેલા સગા-સંબંધીઓ માટે નિઃશુલ્ક પૌષ્ટિક ભોજનની પણ ઉત્તમ વ્યવસ્થા કરવામાં આવે છે.
રોજ ૧,૫૦૦થી વધુ દર્દીઓ લે છે લાભ, માસિક રૂ. ૨ કરોડનો સેવા યજ્ઞ
હાલના તબક્કે આ હોસ્પિટલમાં દરરોજ ૧,૫૦૦થી વધુ જરૂરિયાતમંદ દર્દીઓ વિવિધ રોગોની નિઃશુલ્ક સારવારનો લાભ લઈ રહ્યા છે. નવી સુવિધાઓ અને મોટો વિસ્તાર ઉમેરાતાં હોસ્પિટલનો માસિક સંચાલન ખર્ચ વધીને આશરે રૂપિયા ૨ કરોડ સુધી પહોંચશે. ઉદારમના દાતાઓના નિઃસ્વાર્થ સહયોગ, ટ્રસ્ટીઓની સેવાભાવના અને પૂજ્ય મોરારીબાપુના અવિરત આશીર્વાદથી ધબકતો આ માનવસેવા યજ્ઞ આજે સમગ્ર ગુજરાત માટે એક અજોડ અને પ્રેરણાદાયી ઉદાહરણ બની રહ્યો છે.
About the Author
