મુખ્ય હાઇલાઇટ્સ:
- સાવરકુંડલાના હાથસણી રોડ પર આવેલી હોસ્પિટલની બિનખેતીની સર્વે નંબર ૩૯૩/૧ ની જમીન સરકાર હસ્તક કરાશે.
- કાગળ પર મલ્ટી-સ્પેશિયાલિટી સારવારના દાવા છતાં વાસ્તવિકતામાં હોસ્પિટલ હાલ તાળાબંધીની હાલતમાં.
- સરકારી એમ્બ્યુલન્સ ધૂળ ખાઈ રહી છે અને વીજ કનેક્શન પણ કપાઈ ગયું હોવાનો ખુલાસો.
- મામલતદાર અને સર્વેયર દ્વારા તાત્કાલિક માપણી શીટ તૈયાર કરી કાનૂની કાર્યવાહી તેજ કરાઈ.
શરતભંગ બદલ આશરે ૮ એકર જમીન સરકાર હસ્તક કરવાનો આદેશ
અમરેલી જિલ્લાના સાવરકુંડલા ખાતે હાથસણી રોડ પર આવેલી વી. જે. પારેખ આંખની હોસ્પિટલ મામલે ભારે ખળભળાટ મચાવતો વહીવટી નિર્ણય સામે આવ્યો છે. અમરેલી જિલ્લા કલેક્ટર દ્વારા શરતભંગ બદલ આ હોસ્પિટલની આશરે ૮ એકર જેટલી ખુલ્લી જમીન તાત્કાલિક ધોરણે શ્રીસરકાર કરવાનો સત્તાવાર હુકમ જારી કરવામાં આવ્યો છે. સરકારી આદેશ અને ઉપલબ્ધ દસ્તાવેજો અનુસાર, કુંડલા ગામના સર્વે નંબર ૩૯૩/૧ ની બિનખેતીની જમીન પર આ વિશાળ હોસ્પિટલનું નિર્માણ કરવામાં આવ્યું હતું.
સુવિધાઓના અભાવે તાળાબંધી, વીજ કનેક્શન પણ કપાયું
કાગળ પર આ હોસ્પિટલમાં આધુનિક મલ્ટી-સ્પેશિયાલિટી સારવાર ઉપલબ્ધ કરાવવાના મોટા દાવા કરવામાં આવ્યા હતા, પરંતુ વાસ્તવિકતામાં અહીં પ્રાથમિક આરોગ્ય સુવિધાઓ પણ ઉપલબ્ધ ન હોવાના આક્ષેપો સ્થાનિકો દ્વારા કરવામાં આવી રહ્યા છે. હાલમાં આ હોસ્પિટલ સંપૂર્ણપણે તાળાબંધી જેવી હાલતમાં છે. હોસ્પિટલના પરિસરમાં સરકારી એમ્બ્યુલન્સ ધૂળ ખાઈ રહી છે અને હોસ્પિટલનું વીજ કનેક્શન પણ કપાઈ ગયું હોવાની વિગતો સપાટી પર આવી છે, જેના કારણે તંત્ર દ્વારા આકરી કાર્યવાહી હાથ ધરવામાં આવી છે.
માપણી શીટ તૈયાર કરી કાનૂની કાર્યવાહી તેજ, પ્રજાહિતમાં જમીન વાપરવા માગ
જિલ્લા કલેક્ટરના કડક હુકમ બાદ હવે સાવરકુંડલા મામલતદાર અને સર્વેયરની ટીમ દ્વારા તાત્કાલિક ધોરણે જમીનની માપણી શીટ તૈયાર કરીને આશરે ૮ એકર જમીનનો કબ્જો સરકાર હસ્તક લેવાની કાનૂની કાર્યવાહી અત્યંત ઝડપી બનાવી દેવામાં આવી છે. બીજી તરફ, સાવરકુંડલાની સ્થાનિક જનતા દ્વારા ઉગ્ર માગ કરવામાં આવી રહી છે કે આ જમીન તાત્કાલિક ધોરણે પ્રજાહિતના ઉપયોગમાં લેવામાં આવે અને સમગ્ર કૌભાંડ કે બેદરકારી મામલે જવાબદારો સામે યોગ્ય કાર્યવાહી કરવામાં આવે.
About the Author
