મુખ્ય હાઇલાઇટ્સ:
- હત્યા અને લૂંટ જેવા ગંભીર ગુનાઓમાં છેલ્લા ૫ વર્ષથી ફરાર પેરોલ જંપ કેદી અલ્તાફ ઉર્ફે ભુરો ઝડપાયો.
- કમાન્ડ કન્ટ્રોલ રૂમ (નેત્રમ) સીસીટીવી કેમેરા અને પેરોલ ફર્લો સ્કવોડની બાજ નજરથી આરોપી પકડાયો.
- સમર્પણ બાયપાસથી બાઈક પર પસાર થતા આરોપીનો પીછો કરી જૂના એસ.ટી. બસ સ્ટેન્ડ રોડ પરથી દબોચાયો.
- જામનગર પંચકોશી બી ડિવિઝન પોલીસ સ્ટેશનના ગુનામાં ફરાર આરોપીને કાયદેસરની કાર્યવાહી બાદ જેલ હવાલે કરાયો.
હત્યા અને લૂંટના ગુનામાં ૫ વર્ષથી ફરાર પેરોલ જંપ કેદીની અટકાયત
જામનગર શહેરમાં કાયદો અને વ્યવસ્થાની સ્થિતિ સુદ્રઢ બનાવવા અને નાસતા ફરતા ગુનેગારોને પકડી પાડવા માટે પોલીસે હાથ ધરેલી વિશેષ ઝુંબેશમાં મોટો ધડાકો થયો છે. જામનગર પંચકોશી બી ડિવિઝન પોલીસ સ્ટેશનમાં નોંધાયેલા મર્ડર અને લૂંટ જેવા અત્યંત ગંભીર ગુનામાં છેલ્લા ૫ વર્ષથી પેરોલ જંપ કરીને નાસતો ફરતો રીઢો ગુનેગાર આખરે પોલીસના સિકંજામાં આવી ગયો છે. પોલીસે આરોપી અલ્તાફ ઉર્ફે ભુરો ઉર્ફે અલી ઉમરભાઈ ખફીની અટકાયત કરીને જેલના સળિયા પાછળ ધકેલી દીધો છે.
સીસીટીવી વોચ અને ‘નેત્રમ’ સર્વેલન્સથી સમર્પણ બાયપાસથી કરાયો પીછો
આરોપી ગુનો આચર્યા બાદ અને પેરોલ મેળવ્યા પછી ફરાર થઈ ગયો હતો. દરમિયાન જામનગર કમાન્ડ એન્ડ કન્ટ્રોલ રૂમ (નેત્રમ) અને પેરોલ ફર્લો સ્કવોડને સીસીટીવી સર્વેલન્સ મારફતે ચોક્કસ માહિતી મળી હતી કે આરોપી બાઈક પર સવાર થઈને સમર્પણ બાયપાસ વિસ્તારમાંથી પસાર થઈ રહ્યો છે. આ બાતમીના આધારે નેત્રમ ટીમ અને પેરોલ ફર્લો સ્કવોડે તાત્કાલિક ટેકનિકલ વોચ ગોઠવીને સમર્પણ બાયપાસથી આરોપીનો ફિલ્મી ઢબે પીછો કરવાનું શરૂ કર્યું હતું.
જૂના બસ સ્ટેન્ડ રોડ પરથી અલગ-અલગ ટીમોએ ઘેરો ઘાલીને દબોચ્યો
આરોપી શહેરમાંથી ભાગી છૂટે તે પહેલાં જ પેરોલ ફર્લો સ્કવોડ દ્વારા જૂના એસ.ટી. બસ સ્ટેન્ડ રોડ પર અલગ-અલગ ટીમો રવાના કરીને ચારેય તરફથી નાકાબંધી કરવામાં આવી હતી. પોલીસે ત્વરિત કાર્યવાહી કરીને બાઈકસવાર કેદીને રસ્તામાં જ મજબૂત કોર્ડન કરીને દબોચી લીધો હતો. ધરપકડ બાદ આરોપી સામે આગળની જરૂરી કાયદેસરની કાર્યવાહી હાથ ધરીને તેને જામનગર જિલ્લા જેલ ખાતે સોંપવામાં આવ્યો છે. ૫ વર્ષ જૂના ફરાર કેદીને પકડી પાડવામાં પેરોલ ફર્લો સ્કવોડ અને નેત્રમ ટીમની આ સતર્કતાપૂર્ણ કામગીરીની ઉચ્ચ પોલીસ અધિકારીઓએ સરાહના કરી છે.
અહેવાલ: ફારૂક બિલખિયા
About the Author
