મુખ્ય હાઇલાઇટ્સ:
- નશીલા પદાર્થો સામે રાજકોટ પોલીસના વિશેષ મિશન હેઠળ એસ.ઓ.જી. શાખાને મળી મોટી સફળતા.
- ભગવતીપરા વિસ્તારમાંથી સફેદ રંગની ક્રેટા કાર સાથે આરોપી જગદીશ ઉર્ફે જીગો ગોગરા ઝડપાયો.
- ૬૭.૨૬ ગ્રામ મેફેડ્રોન ડ્રગ્સ, બે મોંઘા મોબાઈલ, ડિજિટલ વજનકાંટો અને કાર સહિત રૂ. ૧૧.૨૬ લાખનો મુદ્દામાલ કબજે.
- મોરબી બી ડિવિઝન પોલીસ સ્ટેશનના નશીલા પદાર્થોના ગુનામાં છેલ્લા બે મહિનાથી નાસતો ફરતો હતો આરોપી.
ભગવતીપરામાંથી ક્રેટા કાર સાથે આરોપીની ધરપકડ, મેફેડ્રોન ડ્રગ્સ જપ્ત
રાજકોટ શહેરમાં નશીલા પદાર્થોના ખરીદ-વેચાણ અને સેવન વિરુદ્ધ પોલીસ દ્વારા ચલાવવામાં આવી રહેલા વિશેષ મિશન હેઠળ એસ.ઓ.જી. (સ્પેશિયલ ઓપરેશન ગ્રુપ) ની ટીમે મોટી કાર્યવાહી હાથ ધરી છે. એસ.ઓ.જી. ટીમને ચોક્કસ બાતમી મળી હતી કે મોરબીના ગુનામાં નાસતો ફરતો આરોપી જગદીશ ઉર્ફે જીગર ઉર્ફે જીગો જીલુભાઈ ગોગરા સફેદ રંગની ક્રેટા કારમાં માદક પદાર્થનો જથ્થો લઈને ભગવતીપરા શેરી નંબર-૧૯ પાસે આવવાનો છે. આ બાતમીના આધારે પોલીસે તાત્કાલિક વોચ ગોઠવીને શંકાસ્પદ કારને આંતરી લીધી હતી. કારની અંગઝડતી અને તલાશી લેતાં તેમાંથી ૬૭.૨૬ ગ્રામ જેટલો મેફેડ્રોન ડ્રગ્સનો જથ્થો મળી આવ્યો હતો.
મોબાઈલ, વજનકાંટો અને કાર સહિત ૧૧.૨૬ લાખથી વધુનો મુદ્દામાલ જપ્ત
પોલીસે દરોડા દરમિયાન આરોપી પાસેથી મેફેડ્રોન ડ્રગ્સ ઉપરાંત બે કિંમતી મોબાઈલ ફોન, ક્રેટા કાર, રોકડ રકમ, પોકેટ સાઈઝ ડિજિટલ વજનકાંટો, પ્લાસ્ટિકની ૧૧૧ વેક્યૂમ પેક કોથળીઓ, પાન કાર્ડ અને વાહનની આર.સી. બુક સહિતનો સામાન કબજે કર્યો છે. જપ્ત કરાયેલા કુલ મુદ્દામાલની કિંમત રૂ. ૧૧,૨૬,૯૭૦ અંકાયી છે. જેમાં રૂ. ૨.૦૧ લાખથી વધુ કિંમતનું મેફેડ્રોન, બે સ્માર્ટફોન અને રૂ. ૮ લાખની કિંમતની ક્રેટા કારનો સમાવેશ થાય છે.
મોરબીના ગુનામાં બે મહિનાથી ફરાર હતો આરોપી, બી ડિવિઝનમાં ગુનો નોંધાયો
ઝડપાયેલો આરોપી મૂળ મોરબી જિલ્લાના લીલાપર રોડ પર આવેલા બોરીચાવાસ વિસ્તારનો રહેવાસી છે. આશરે બે મહિના અગાઉ મોરબી બી ડિવિઝન પોલીસ સ્ટેશનમાં નોંધાયેલા નશીલા પદાર્થો સંબંધિત ગુનામાં તેનું નામ ખુલ્યા બાદથી તે નાસતો ફરતો હતો. આ મામલે રાજકોટ બી ડિવિઝન પોલીસ સ્ટેશનમાં ગુનો નોંધીને એસ.ઓ.જી. પી.આઈ. એન.બી. ચૌધરી, એન્ટી નાર્કોટિક્સ વિંગના પી.આઈ. બી.બી. જાડેજા અને પી.એસ.આઈ. આર.કે. ગોહિલની ટીમે આરોપી આ નશીલો પદાર્થ ક્યાંથી લાવ્યો હતો અને કોને પહોંચાડવાનો હતો તે દિશામાં વધુ તપાસ હાથ ધરી છે.
અહેવાલ :ફારૂક બિલખિયા
About the Author
