મુખ્ય હાઇલાઇટ્સ:
- ધારી વન વિભાગની તુલસીશ્યામ રેન્જના બોરાળા રાઉન્ડમાં હાઈવે પર અકસ્માત સર્જાયો.
- બોરાળા-ખાંભા હાઈવે પર પૂરઝડપે આવતા અજાણ્યા વાહને દીપડાને અડફેટે લેતાં સ્થળ પર જ મોત.
- બનાવની જાણ થતાં વન વિભાગનો કાફલો તાત્કાલિક ઘટનાસ્થળે દોડી ગયો.
- વન વિભાગે અજાણ્યા વાહનચાલક સામે ગુનો નોંધી આરોપીને ઝડપી પાડવા સીસીટીવી ફૂટેજની તપાસ શરૂ કરી.
બોરાળા-ખાંભા હાઈવે પર અજાણ્યા વાહનની ટક્કરે દીપડાનું કમકમાટીભર્યું મોત
અમરેલી જિલ્લામાં અવારનવાર વન્યપ્રાણીઓના માર્ગ અકસ્માતમાં મોત થવાના બનાવો સામે આવતા હોય છે, ત્યારે ધારી વન વિભાગના તુલસીશ્યામ રેન્જ વિસ્તારમાંથી એક દુઃખદ ઘટના પ્રકાશમાં આવી છે. તુલસીશ્યામ રેન્જના બોરાળા રાઉન્ડ હેઠળ આવતા બોરાળા-ખાંભા હાઈવે રોડ પર એક દીપડો રસ્તો ઓળંગી રહ્યો હતો, તે સમયે પૂરઝડપે અને બેદરકારીપૂર્વક આવી રહેલા એક અજાણ્યા વાહને તેને જોરદાર ટક્કર મારી હતી. આ અકસ્માતમાં ગંભીર ઈજાઓ પહોંચવાના કારણે દીપડાનું ઘટનાસ્થળે જ કમકમાટીભર્યું મોત નીપજ્યું હતું.
ઘટનાની જાણ થતાં વન વિભાગની ટીમ સ્થળ પર પહોંચી
હાઈવે રોડ પર દીપડો મૃત હાલતમાં પડ્યો હોવાની જાણ થતાં જ આસપાસના વિસ્તારમાં અફરાતફરી મચી ગઈ હતી. ઘટના અંગે સ્થાનિકો દ્વારા ધારી વન વિભાગને જાણ કરવામાં આવતાં જ વન વિભાગનો સ્ટાફ અને ઉચ્ચ અધિકારીઓ તાત્કાલિક સ્થળ પર દોડી આવ્યા હતા. વન વિભાગની ટીમે કાયદેસરની કાર્યવાહી હાથ ધરીને મૃત દીપડાના દેહને પોસ્ટમોર્ટમ અર્થે ખસેડવાની પ્રક્રિયા હાથ ધરી હતી.
અજાણ્યા વાહન સામે ગુનો નોંધાયો, સીસીટીવી ફૂટેજના આધારે તપાસ તેજ
માર્ગ અકસ્માતમાં વન્યપ્રાણીનું મોત નિપજાવનાર અજાણ્યા વાહનચાલક સામે ધારી વન વિભાગ દ્વારા વન્યજીવ સંરક્ષણ કાયદા હેઠળ ગુનો નોંધવામાં આવ્યો છે. અકસ્માત સર્જીને ફરાર થઈ ગયેલા વાહનને ટ્રેસ કરવા માટે બોરાળા-ખાંભા હાઈવે પર આવેલી હોટલો, પેટ્રોલ પંપ અને ચેકપોસ્ટ પર લાગેલા સીસીટીવી કેમેરાના ફૂટેજ મેળવીને ઊંડાણપૂર્વક તપાસ શરૂ કરવામાં આવી છે. વન વિભાગ દ્વારા દાવો કરવામાં આવ્યો છે કે સીસીટીવી ફૂટેજના આધારે ટૂંક સમયમાં જ ગુનેગાર વાહનચાલકને ઝડપી લેવામાં આવશે.
અહેવાલ ફારૂક બિલખીયા અમરેલી
About the Author
