મુખ્ય હાઇલાઇટ્સ:
- ગાંધીનગર જિલ્લાના ચિલોડા-પ્રાંતિજ હાઈવે પર વહેલી સવારે સર્જાયો ગમખ્વાર માર્ગ અકસ્માત.
- અંબાજી જતા પદયાત્રીઓની નિઃશુલ્ક સેવા માટે જતા અમદાવાદના ૧૬ રસોઈયાઓ ઈજાગ્રસ્ત.
- ડાલામાં રસોઈનો સામાન ભરીને જઈ રહેલા ચાલકે સ્ટેરિંગ પરથી કાબુ ગુમાવતા વાહન પલટી મારી ગયું.
- ઈજાગ્રસ્તોમાંથી ૩ લોકોની હાલત નાજુક હોવાથી અમદાવાદ સિવિલ હોસ્પિટલ ખસેડાયા; ડભોડા પોલીસે તપાસ હાથ ધરી.
ચિલોડા-પ્રાંતિજ હાઈવે પર ગમખ્વાર માર્ગ અકસ્માત
ગાંધીનગર જિલ્લામાંથી પસાર થતા ચિલોડા-પ્રાંતિજ હાઈવે પર આજે વહેલી સવારે એક અત્યંત ગંભીર માર્ગ અકસ્માત સર્જાયો છે. ભાદરવી પૂનમના મહામેળા નિમિત્તે અંબાજી જતા માઈભક્તો અને પદયાત્રીઓની સેવા માટે નીકળેલા રસોઈયાઓ ભરેલું ડાલું પલટી મારી જતાં મોટી દુર્ઘટના ઘટી છે. આ દુર્ઘટનામાં વાહનમાં સવાર ૧૬ જેટલા સેવાભાવી યુવાનો ઈજાગ્રસ્ત થયા છે, જેના પગલે વિસ્તારમાં અરેરાટી વ્યાપી ગઈ છે.
અમદાવાદના વસ્ત્રાલના યુવાનો અંબાજી પદયાત્રીઓની સેવા અર્થે જતા હતા
મળતી વિગતો મુજબ, અકસ્માતનો ભોગ બનેલા તમામ ૧૬ રસોઈયાઓ અમદાવાદના વસ્ત્રાલ વિસ્તારમાં રહેતા સેવાભાવી યુવાનો છે. ભાદરવી પૂનમનો મેળો નજીક હોવાથી દર વર્ષની જેમ આ વર્ષે પણ તેઓ અંબાજી જતા પદયાત્રી સંઘો માટે નિઃશુલ્ક ગરમ ભોજન, ચા અને નાસ્તાની સેવા આપવા જઈ રહ્યા હતા. તેઓ વાહનમાં ગેસના બાટલા, મોટા વાસણો, લોટ, તેલ અને શાકભાજી સહિતનો રસોઈનો તમામ સામાન ભરીને નીકળ્યા હતા. દરમિયાન ચિલોડા-પ્રાંતિજ માર્ગ પર ડાલાના ચાલકે અચાનક સ્ટેરિંગ પરથી કાબુ ગુમાવી દેતાં વાહન રોડ પર જ પલટી મારી ગયું હતું.
૩ ઈજાગ્રસ્તોની હાલત ગંભીર: અમદાવાદ સિવિલ હોસ્પિટલ રિફર કરાયા
અકસ્માત થતાં જ આસપાસના સ્થાનિક લોકો તાત્કાલિક મદદ માટે દોડી આવ્યા હતા અને ૧૦૮ ઈમરજન્સી એમ્બ્યુલન્સને જાણ કરી હતી. તમામ ૧૬ ઈજાગ્રસ્તોને તાત્કાલિક ધોરણે નજીકની હોસ્પિટલમાં સારવાર અર્થે ખસેડવામાં આવ્યા હતા. આ પૈકી ૩ લોકોની શારીરિક હાલત વધુ નાજુક જણાતાં તેમને વધુ ગહન સારવાર માટે અમદાવાદ સિવિલ હોસ્પિટલ ખાતે રિફર કરવામાં આવ્યા છે. ઘટનાની જાણ થતાં જ ડભોડા પોલીસ મથકની ટીમે સ્થળ પર પહોંચીને ગુનો નોંધી આગળની કાયદેસરની તપાસ હાથ ધરી છે.
ગાંધીનગર પ્રવાસી પત્રકાર રાજેશ પરીખ
About the Author
