મુખ્ય હાઇલાઇટ્સ:
- વડાપ્રધાન નરેન્દ્ર મોદીના જન્મદિવસ નિમિત્તે અમરેલીના ઐતિહાસિક કામનાથ મહાદેવ ખાતે ‘આશીર્વાદના દીવા’ જિલ્લાકક્ષાનો ભવ્ય કાર્યક્રમ યોજાયો.
- નાયબ મુખ્યમંત્રી હર્ષ સંઘવીએ વર્ચ્યુઅલ માધ્યમથી જોડાઈને વડાપ્રધાનશ્રીના નેતૃત્વ અને વિકાસકાર્યોને બિરદાવ્યા.
- કાયદો અને ઊર્જા રાજ્યમંત્રી કૌશિક વેકરીયા તથા સાંસદ ભરત સુતરીયા સહિતના મહાનુભાવો અને મોટી સંખ્યામાં નાગરિકો રહ્યા ઉપસ્થિત.
- મંદિર પરિસરમાં હજારો દીપ પ્રાગટ્ય, ભવ્ય રંગોળી, સાંસ્કૃતિક પ્રસ્તુતિ અને શંખનાદ સાથે દિવ્ય મહાઆરતી યોજાઈ.
- ૧૭ સપ્ટેમ્બરથી ૧૭ ઓક્ટોબર ૨૦૨૬ સુધી સમગ્ર રાજ્યમાં ‘સેવા સંકલ્પ અભિયાન’ નું વિશેષ આયોજન.
અમરેલીમાં ‘આશીર્વાદના દીવા’ જિલ્લાકક્ષાના ભવ્ય કાર્યક્રમનું સફળ આયોજન
વડાપ્રધાન શ્રી નરેન્દ્રભાઈ મોદીના જાહેરજીવનમાં ૨૫ વર્ષની નિષ્ઠાપૂર્વકની સેવા અને સમર્પણના ઉપલક્ષમાં સમગ્ર રાજ્યમાં ૧૭ ઓક્ટોબર ૨૦૨૬ સુધી ‘સેવા સંકલ્પ અભિયાન’ નું વિશેષ આયોજન કરવામાં આવ્યું છે. આ અભિયાન અંતર્ગત ૧૭ સપ્ટેમ્બર ૨૦૨૬ ના રોજ વડાપ્રધાનશ્રીના જન્મદિન નિમિત્તે અમરેલી સ્થિત પૌરાણિક કામનાથ મહાદેવ મંદિરના સાનિધ્યમાં ‘આશીર્વાદના દીવા’ જિલ્લાકક્ષાનો ભવ્ય કાર્યક્રમ યોજાયો હતો. આ પ્રસંગે કાયદો અને ઊર્જા રાજ્યમંત્રી શ્રી કૌશિકભાઈ વેકરીયા, સાંસદ શ્રી ભરતભાઈ સુતરીયા સહિતના પદાધિકારીઓ અને મોટી સંખ્યામાં ઉપસ્થિત નાગરિકોએ વડાપ્રધાનશ્રીના નિરામય આરોગ્ય, દીર્ઘાયુ અને રાષ્ટ્રની સુખાકારી માટે શ્રદ્ધાપૂર્વક પ્રાર્થના કરી હતી.
વિકસિત ભારત-૨૦૪૭ના સંકલ્પને સાકાર કરતું નેતૃત્વ: નાયબ મુખ્યમંત્રી હર્ષ સંઘવી
કાર્યક્રમમાં વર્ચ્યુઅલ માધ્યમથી જોડાયેલા નાયબ મુખ્યમંત્રી શ્રી હર્ષભાઈ સંઘવીએ ઉપસ્થિત જનમેદનીને ભાવસભર સંબોધન કરતા જણાવ્યું હતું કે, વડાપ્રધાન શ્રી નરેન્દ્રભાઈ મોદીના સશક્ત નેતૃત્વમાં દેશમાં વિકાસના અનેક અભૂતપૂર્વ કાર્યો સિદ્ધ થયા છે. પ્રધાનમંત્રી આવાસ યોજના થકી દેશના કરોડો ગરીબોને પાકા મકાન સહિતની મૂળભૂત સુવિધાઓ પ્રાપ્ત થઈ છે. આઝાદી પછી દેશને પ્રથમ વખત આવું મજબૂત નેતૃત્વ મળ્યું છે, જેમના માર્ગદર્શન હેઠળ ભારત ‘વિકસિત ભારત-૨૦૪૭’ ના સોનેરી સ્વપ્નને સાકાર કરવા તરફ ઝડપથી આગળ વધી રહ્યું છે.
હજારો દીવડાઓ, રંગોળી અને મંત્રોચ્ચારથી ભક્તિમય બન્યું મંદિર પરિસર
‘આશીર્વાદના દીવા’ મહોત્સવ અંતર્ગત અમરેલીના ઐતિહાસિક કામનાથ મહાદેવ મંદિરને મનમોહક અને સુગંધિત ફૂલોથી ભવ્ય રીતે શણગારવામાં આવ્યું હતું. મંદિરના વિશાળ પટાંગણમાં હજારો દીવાઓ પ્રજ્વલિત કરવામાં આવતા આખું પરિસર પવિત્ર પ્રકાશથી ઝળહળી ઊઠ્યું હતું. પ્રાંગણમાં દોરવામાં આવેલી આકર્ષક રંગોળીઓ અને ઋષિગણો દ્વારા કરવામાં આવેલા ઓમકાર નાદ તથા શાસ્ત્રોક્ત મંત્રોચ્ચારે વાતાવરણને ભક્તિસભર બનાવી દીધું હતું. રાજ્યમંત્રી શ્રી કૌશિકભાઈ વેકરીયાએ જણાવ્યું હતું કે, રાષ્ટ્રના વિકાસ માટે વડાપ્રધાનશ્રીએ પોતાના ૨૫ વર્ષના સેવાકાળ દરમિયાન એક પણ રજા લીધા વિના નિરંતર પરિશ્રમ કર્યો છે.
સાંસ્કૃતિક કાર્યક્રમો અને દિવ્ય મહાઆરતીનું આયોજન
આ મહોત્સવના મુખ્ય આકર્ષણરૂપે સ્થાનિક કલાવૃંદો દ્વારા શિવ તાંડવ અને શિવ વંદનાની ભાવપૂર્ણ નૃત્ય પ્રસ્તુતિ રજૂ કરવામાં આવી હતી, જેણે ઉપસ્થિત સૌ શ્રોતાઓને મંત્રમુગ્ધ કર્યા હતા. સાંજે હજારો દીવડાઓની રોશની, શંખનાદ, ઢોલ-નગારા અને ઝાલરના દિવ્ય નાદ સાથે ભગવાન કામનાથ મહાદેવની મહાઆરતી યોજાઈ હતી. આ કાર્યક્રમમાં જિલ્લા પંચાયત પ્રમુખ દક્ષાબેન ચોડવડીયા, અમરેલી નગરપાલિકા પ્રમુખ વૈશાલીબેન માંગરોળીયા, જિલ્લા કલેક્ટર વિકલ્પ ભારદ્વાજ, જિલ્લા વિકાસ અધિકારી પ્રજાપતિ, જિલ્લા પોલીસ વડા સંજય ખરાત, સુપર ન્યુમરરી આસિસ્ટન્ટ કલેક્ટર હર્ષિતા ગોયલ, નાગરિક બેંકના ચેરમેન પી.પી. સોજીત્રા સહિતના ઉચ્ચ અધિકારીઓ, રાજકીય અગ્રણીઓ અને શહેરના નાગરિકો વિશાળ સંખ્યામાં હાજર રહ્યા હતા.
અહેવાલ ભાવેશ વાઘેલા અમરેલી
About the Author
