મુખ્ય હાઇલાઇટ્સ:
- વિરમગામ, માંડલ, દેત્રોજ, રામપુરા, ભંકોડા અને સાણંદ પંથકમાં જૈન સમાજ દ્વારા સંવત્સરી પર્વની ઉજવણી.
- સ્થાનિક ઉપાશ્રયો અને આરાધના ભવનોમાં હરિભક્તોએ સ્થિરતા જાળવીને ત્રણ કલાક લાંબુ પ્રતિક્રમણ કર્યું.
- વર્ષ દરમિયાન જાણતા-અજાણતા થયેલી ભૂલો અને મન-વચન-કર્મથી થયેલા અપરાધો માટે ક્ષમાપના માગી.
- વિવિધ સ્થાનકવાસી અને મૂર્તિપૂજક જૈન સંઘો દ્વારા વિશિષ્ટ ધાર્મિક આરાધનાનું આયોજન કરાયું.
વિરમગામ અને આસપાસના વિસ્તારોમાં જૈન પર્વાધિરાજ સંવત્સરીની ઉજવણી
અમદાવાદ જિલ્લાના વિરમગામ, માંડલ, દેત્રોજ, રામપુરા, ભંકોડા તેમજ સાણંદ સહિતના વિસ્તારોમાં મંગળવારે જૈન સમુદાય દ્વારા પર્વાધિરાજ પર્યુષણના અંતિમ અને મહત્ત્વના દિવસ એવા સંવત્સરી પર્વની પરંપરાગત રીતે ભક્તિભાવપૂર્વક ઉજવણી કરવામાં આવી હતી. આ પાવન દિવસે સમગ્ર પંથકના જૈન દેરાસરો અને ઉપાશ્રયોમાં વહેલી સવારથી જ શ્રદ્ધાળુઓનો ભારે જમાવડો જોવા મળ્યો હતો અને ધાર્મિક આરાધનાઓથી વાતાવરણ ભક્તિમય બની ગયું હતું.
ત્રણ કલાક લાંબુ પ્રતિક્રમણ કરી માગી ક્ષમાપના
વિરમગામ શહેર સ્થિત શાલીભદ્ર આરાધના ભવન, જીવીબા શ્રાવિકા ઉપાશ્રય, પાર્શ્વચંદ્ર જૈન સંઘ, છ કોટી સ્થાનકવાસી જૈન સંઘ, દરિયાપુરી સ્થાનકવાસી જૈન સંઘ તેમજ શ્વેતાંબર મૂર્તિપૂજક જૈન સંઘના વિવિધ ઉપાશ્રયો ખાતે મોટી સંખ્યામાં શ્રાવક-શ્રાવિકાઓ એકત્રિત થયા હતા. જૈન ધર્મના આરાધકોએ એક જ જગ્યાએ ચિત્તની સ્થિરતા જાળવીને આશરે ત્રણ કલાક જેટલું લાંબુ સંવત્સરી પ્રતિક્રમણ કર્યું હતું. પ્રતિક્રમણ પૂર્ણ થયા બાદ સૌ ભક્તોએ વિતેલા વર્ષ દરમિયાન જાણતા કે અજાણતા થયેલી તમામ ભૂલો બદલ એકબીજા સમક્ષ હૃદયપૂર્વક “મિચ્છામિ દુક્કડં” કહીને ક્ષમાપના માગી હતી.
તપ, જપ અને આરાધના સાથે પર્વની પૂર્ણાહુતિ
સંવત્સરી પર્વ નિમિત્તે ઘણા શ્રદ્ધાળુઓએ અઠ્ઠાઈ, માસક્ષમણ, ઉપવાસ અને એકાસણા જેવા કઠિન તપ-જપ કરી આત્મશુદ્ધિનો માર્ગ અપનાવ્યો હતો. પર્વના અંતે જૈન સમાજના લોકોએ એકબીજાના ઘરે જઈ તેમજ ટેલિફોનિક માધ્યમથી સગા-સંબંધીઓ અને સ્નેહીઓને મન, વચન અને કાયાથી થયેલા તમામ અપરાધોની ક્ષમા યાચના કરીને પરસ્પરના સંબંધોને વધુ મજબૂત અને પવિત્ર બનાવ્યા હતા.
ગાંધીનગર પ્રવાસી પત્રકાર: રાજેશ પરીખ
About the Author
