મુખ્ય હાઇલાઇટ્સ:
- વોટ્સએપ પર પ્રેમભરી વાતો અને વિડીયો કોલ કરી ફરિયાદીના ફોટા વાયરલ કરવાની ધમકી આપી રૂ. ૧૬.૩૦ લાખથી વધુ પડાવ્યા.
- આંગડિયા તથા વિવિધ બેંક ખાતાઓમાં પૈસા ટ્રાન્સફર કરાવી આચરાયો મોટો તોડ.
- અમરેલી એલસીબી પોલીસે ટેકનિકલ સોર્સ અને બાતમીના આધારે ૨૬ વર્ષીય પ્રતિક પાઘડાળ નામના આરોપીને ઝડપ્યો.
- ભાવનગર રેન્જ આઈજી અને અમરેલી પોલીસ અધિક્ષકના માર્ગદર્શન હેઠળ એલસીબી પીઆઈ સી.પી. વાઘેલાની ટીમે કરી સફળ કામગીરી.
પૂર્વ આયોજિત કાવતરું રચી મહિલા સાથે મળી આચર્યો હનીટ્રેપ
અમરેલી જિલ્લાના બગસરા પોલીસ સ્ટેશન વિસ્તારમાં હનીટ્રેપ આચરીને ફરિયાદી પાસેથી લાખો રૂપિયા બળજબરીપૂર્વક કઢાવી લેવાનો ગંભીર ગુનો સામે આવ્યો હતો. આ કેસની વિગત મુજબ, પકડાયેલ આરોપી પ્રતિક પરશોતમભાઈ પાઘડાળ (ઉંમર વર્ષ ૨૬, રહે. મોટા વરાછા, સુરત, મૂળ રહે. હડાળા, તાલુકો બગસરા) તથા તેના અન્ય સહ-આરોપી મહિલાએ એકસંપ થઈ પૂર્વ આયોજિત કાવતરું રચ્યું હતું. મહિલા આરોપીએ વોટ્સએપ એપ્લિકેશન મારફતે ફરિયાદી સાથે સંપર્ક સાધી પ્રેમભરી વાતો કરીને લલચાવ્યા હતા. ત્યારબાદ વિડીયો કોલ મારફતે ફરિયાદીના અંગત ફોટા મેળવી લીધા હતા.
ફોટા વાયરલ કરવાની ધમકી આપી રૂ. ૧૬.૩૦ લાખ પડાવ્યા
ફોટા મેળવ્યા બાદ આરોપીઓએ ફરિયાદીને આ ફોટા સોશિયલ મીડિયા પર વાયરલ કરી દેવાની ધાક-ધમકી આપી હતી. બ્લેકમેલિંગ કરી અલગ-અલગ સમયે આંગડિયા મારફતે તેમજ વિવિધ બેંક ખાતાઓમાં ઓનલાઈન પૈસા ટ્રાન્સફર કરાવીને કુલ રૂ. ૧૬,૩૦,૧૧૦/- ની માતબર રકમ બળજબરીપૂર્વક કઢાવી લીધી હતી. આ ઉપરાંત ફોનમાં મેસેજ કરી ગાળો આપી ધમકીઓ આપતાં આખરે ભોગ બનનાર ફરિયાદીએ બગસરા પોલીસ મથકે ફરિયાદ નોંધાવી હતી, જેના આધારે ભારતીય ન્યાય સંહિતા ૨૦૨૩ અને આઈટી એક્ટની વિવિધ કલમો હેઠળ ગુનો રજીસ્ટર થયો હતો.
અમરેલી એલસીબી પોલીસે ગણતરીના દિવસોમાં આરોપીને દબોચ્યો
ભાવનગર રેન્જ આઈજીપી આર.વી. અસારી તેમજ અમરેલી જિલ્લા પોલીસ અધિક્ષક સંજય ખરાત દ્વારા નાસતા ફરતા ગુનેગારોને પકડી પાડવા આપેલી સૂચના મુજબ અમરેલી એલસીબી પોલીસ ઈન્સપેક્ટર સી.પી. વાઘેલાની રાહબરી હેઠળ તપાસનો ધમધમાટ શરૂ કરાયો હતો. એલસીબી ટીમે ખાનગી બાતમીદારો અને ટેકનિકલ સોર્સના આધારે મુખ્ય આરોપી પ્રતિક પાઘડાળને ઝડપી લીધો હતો અને આગળની કાયદેસરની કાર્યવાહી અર્થે તેને બગસરા પોલીસ સ્ટેશનને સોંપી આપ્યો હતો.
અહેવાલ ભાવેશ વાઘેલા અમરેલી
About the Author
