મુખ્ય હાઇલાઇટ્સ:
- સોશિયલ મીડિયાનો દુરુપયોગ: આરતીબેન મોદી નામની મહિલાએ ફેસબુક પર ફ્રેન્ડ રિક્વેસ્ટ મોકલી ઓળખાણ વધાર્યા બાદ ફરિયાદીને અમરેલી બોલાવ્યો હતો.
- માનતાના બહાને ધારી લઈ ગયા: ખોડિયાર માતાજીની માનતા પૂરી કરવાના બહાને ફરિયાદીની મોટરસાયકલ પર બેસી ધારી પહોંચ્યા બાદ કાવતરા મુજબ અન્ય સહ-આરોપીઓ ત્યાં ધસી આવ્યા.
- છરી બતાવી ₹૩ લાખની માંગણી: ચારેય આરોપીઓએ ભેગા મળી ફરિયાદીને ડરાવી, ગાળો આપી અને છરી બતાવી ભયના ઓથાર હેઠળ ₹૧ લાખ બળજબરીપૂર્વક પડાવી લીધા.
- મુદ્દામાલ અને ધરપકડ: અમરેલી સિટી પોલીસે ટેકનિકલ સોર્સની મદદથી ₹૯૫,૦૦૦ની રોકડ, ૨ બાઇક અને છરી સાથે ચારેય આરોપીઓને પકડી પાડ્યા.
માનતાના બહાને ધારી ખોડિયાર લઈ જઈ ઘડાયું મોટું કાવતરૂ
આ ચકચારી કેસની વિગત એવી છે કે આરોપી આરતીબેન મોદીએ ફરિયાદીને ફેસબુકના માધ્યમથી ફ્રેન્ડ રિક્વેસ્ટ મોકલી મેસેજ દ્વારા વાતચીત વધારી હતી. પરિચય કેળવ્યા બાદ આરતીબેને ફરિયાદીને અમરેલીની સંકુલ ચોકડી ખાતે બાઇક લઈને બોલાવ્યો હતો. ત્યાં પહોંચ્યા બાદ તેણે જણાવ્યું કે ‘મારે ધારી ખોડિયાર માતાજીએ માનતા પૂરી કરવા જવાનું છે, તો મારી સાથે ચાલો.’ ફરિયાદી તેની વાતોમાં આવી જતાં આરતીબેન તેની બાઇક પાછળ બેસીને ધારી ગયા હતા.
ત્યારબાદ પૂર્વ આયોજિત કાવતરાના ભાગરૂપે આરોપી રાહુલ ઉર્ફે બળવંત પરમાર અને તેના પત્ની રૂપાબેન પણ ધારી પહોંચ્યા હતા. તેમણે તરત જ આરતીબેનના પતિ ધવલ મોદીને ફોન કરીને ત્યાં બોલાવી લીધો હતો. ધવલ મોદીએ ત્યાં આવીને ફરિયાદીને લાફો મારી દીધો હતો, જ્યારે આરતીબેને જુઠ્ઠું નાટક કરતાં કહ્યું કે ફરિયાદી તેને બળજબરીપૂર્વક અહીં લાવ્યો છે. આ તકનો લાભ લઈ રાહુલ ઉર્ફે બળવંતે છરી કાઢી ફરિયાદીને જાનથી મારી નાખવાની ધમકી આપી મામલો થાળે પાડવા ₹૩ લાખની માંગણી કરી હતી, જેમાંથી ₹૧ લાખ રોકડા ધવલ મોદીએ બળજબરીપૂર્વક પડાવી લીધા હતા.
પકડાયેલા આરોપીઓ અને તેમની પાસેથી જપ્ત કરાયેલો મુદ્દામાલ
અમરેલી સિટી પોલીસની ટીમે આ મામલે ભારતીય ન્યાય સંહિતા (બીએનએસ) અને ગુજરાત પોલીસ એક્ટની વિવિધ કલમો હેઠળ ગુનો નોંધી ગણતરીના કલાકોમાં આ ચાર આરોપીઓને ઝડપી લીધા હતા: ૧. ધવલભાઈ ભરતભાઈ મોદી (ઉંમર વર્ષ ૨૭, ધંધો: ડ્રાઈવીંગ, રહે. અમરેલી) ૨. આરતીબેન વા/ઓ ધવલભાઈ ભરતભાઈ મોદી (ઉંમર વર્ષ ૩૦, ધંધો: ઘરકામ, રહે. અમરેલી) ૩. બળવંતભાઇ ઉર્ફે નરેશ દેવાભાઈ પરમાર (ઉંમર વર્ષ ૩૦, ધંધો: મજૂરી, રહે. તરફતળાવ) ૪. રૂપાબેન વા/ઓ બળવંત દેવાભાઈ પરમાર (ઉંમર વર્ષ ૨૭, ધંધો: ઘરકામ, રહે. તરફતળાવ)
પોલીસે આરોપીઓ પાસેથી રોકડા ₹૯૫,૦૦૦, ગુનામાં ઉપયોગમાં લેવાયેલી ૨ મોટરસાયકલ (કિંમત ₹૪૫,૦૦૦) અને એક છરી (કિંમત ₹૨૦) મળી કુલ ₹૧,૪૦,૦૨૦નો મુદ્દામાલ કબ્જે કર્યો છે.
પકડાયેલા મુખ્ય સૂત્રધારોનો ગુનાહિત ઇતિહાસ
પોલીસની ઝીણવટભરી તપાસમાં સામે આવ્યું છે કે ઝડપાયેલા આરોપીઓ અગાઉ પણ અનેક ગુનાહિત પ્રવૃત્તિઓમાં સંડોવાયેલા છે. આરોપી ધવલ ભરતભાઇ મોદી વિરૂદ્ધ અગાઉ અમરેલી સિટી પોલીસ સ્ટેશનમાં પ્રોહિબિશન (દારૂબંધી) ના વર્ષ ૨૦૧૯ માં બે અને વર્ષ ૨૦૨૬ માં એક મળી કુલ ૩ ગુનાઓ દાખલ થયેલા છે. જ્યારે બીજા આરોપી બળવંતભાઇ દેવાભાઇ પરમાર વિરૂદ્ધ અમરેલી તાલુકા પોલીસ સ્ટેશનમાં વર્ષ ૨૦૨૨, ૨૦૨૩ અને ૨૦૨૫ માં પ્રોહિબિશન એક્ટ હેઠળ અલગ-અલગ ૩ ગુનાઓ નોંધાઈ ચૂક્યા છે.
ઉચ્ચ પોલીસ અધિકારીઓની ડ્રાઈવ હેઠળ સિટી પોલીસની મોટી સફળતા
ભાવનગર રેન્જ આઇ.જી.પી. શ્રી રાજેન્દ્ર અસારી સાહેબની શરીર સંબંધી અને અપહરણના ગુનાઓ ઉકેલવાની સૂચના અન્વયે, અમરેલી જિલ્લા પોલીસ અધિક્ષક શ્રી સંજય ખરાત અને નાયબ પોલીસ અધિક્ષક શ્રી ચિરાગ દેસાઈના સીધા માર્ગદર્શન હેઠળ આ ઓપરેશન હાથ ધરાયું હતું. અમરેલી સિટી પોલીસ સ્ટેશનના પોલીસ ઇન્સ્પેક્ટર એમ.એમ.ઝાલા, પોલીસ સબ ઇન્સ્પેક્ટર કે.જી.મયા તથા તેમની સર્વેલન્સ ટીમે ટેકનિકલ સોર્સ અને હ્યુમન ઇન્ટેલિજન્સનો બખૂબી ઉપયોગ કરીને આ હનીટ્રેપની ટોળકીને જેલના સળિયા પાછળ ધકેલી દીધી છે. પોલીસની આ ત્વરિત કામગીરીથી અમરેલી પંથકના જાગૃત નાગરિકોએ રાહતનો શ્વાસ લીધો છે.
અહેવાલ: ભાવેશ વાઘેલા અમરેલી
About the Author
