મુખ્ય હાઇલાઇટ્સ:
- વિવિધ સ્થળોએ આયોજન: અમદાવાદ ગ્રામ્યના ધોળકા, બાવળા, વિરમગામ, સાણંદ અને ધંધુકા સહિત આઠ સ્થળોએ નીકળી ભવ્ય રથયાત્રા.
- ઐતિહાસિક રથયાત્રાઓ: ધોળકામાં ૭૫મી, કેલિયા વાસણા ગામે ૫મી અને વિરમગામના ૪૫૦ વર્ષ જૂના રામ મહેલ મંદિરથી ૪૪મી રથયાત્રા પરંપરાગત શ્રદ્ધા સાથે નીકળી.
- માનવતાનું ઉત્કૃષ્ટ ઉદાહરણ: ધોળકામાં રથયાત્રા દરમિયાન ભીડમાં બેભાન થયેલા મહિલા માટે સ્થાનિકોએ માનવ સાંકળ બનાવી તાત્કાલિક રસ્તો કરી આપ્યો.
- કોમી એકતાના દર્શન: યાત્રાના માર્ગો પર હિન્દુ-મુસ્લિમ બિરાદરો દ્વારા મહંતશ્રીઓનું ફૂલહારથી સ્વાગત કરી ભાઈચારો પ્રગટ કરાયો.
ધોળકા અને વિરમગામમાં પરંપરાગત શ્રદ્ધા સાથે નીકળ્યા ત્રણેય રથ
ધોળકા શહેરના હૃદય સમાન ચારશેરી વિસ્તારમાં આવેલા કૃષ્ણ મંદિરથી આ વર્ષે ભવ્ય ૭૫મી રથયાત્રા પ્રસ્થાન પામી હતી. આ પ્લેટિનમ જુબિલી વર્ષ હોવાથી ભક્તોમાં ભારે ઉત્સાહ હતો. બીજી તરફ, કેલિયા વાસણા ગામે આવેલા ઐતિહાસિક રણછોડરાયના મંદિરથી ૫મી રથયાત્રા ભક્તિભાવપૂર્વક નીકળી હતી, જેમાં ભગવાન જગન્નાથ, બહેન સુભદ્રા અને ભાઈ બલરામના ત્રણ નયનરમ્ય રથો આકર્ષણનું કેન્દ્ર બન્યા હતા. આ સાથે જ વિરમગામ શહેરમાં આવેલા ૪૫૦ વર્ષ જૂના રામ મહેલ અને બહુ દેરા મહેલ મંદિરમાંથી ભગવાનની મૂર્તિઓનું રથમાં સ્થાપન કરી ૪૪મી રથયાત્રાનું ચુસ્ત પોલીસ બંદોબસ્ત વચ્ચે પ્રસ્થાન કરાયું હતું. ખાસ વાત એ હતી કે પ્રસ્થાન સમયે જ મેઘરાજાએ પણ હાજરી પૂરવતા ભક્તો ભાવવિભોર બન્યા હતા. રથયાત્રા પૂર્વે જીતેન્દ્રકુમાર ભગવાનદાસ ગુજ્જર પરિવાર તરફથી લાખેણું મામેરું ભરાયું હતું.
ભારે ભીડ વચ્ચે વહી માનવતાની સરવાણી: મહિલા માટે ગ્રીન કોરિડોર બનાવ્યો
ધોળકાના સરોડા રોડ પરથી જ્યારે રથયાત્રા ભવ્ય પ્રવાહમાં પસાર થઈ રહી હતી, ત્યારે એક અણધારી ઘટના બની હતી. રથયાત્રા નિહાળવા આવેલા એક મહિલા અચાનક ભીડ વચ્ચે બેભાન થઈને ઢળી પડ્યા હતા. હજારોની મેદની હોવા છતાં, સ્થાનિક લોકો અને શ્રદ્ધાળુઓએ અદભુત સમયસૂચકતા અને માનવતા દાખવી હતી. ક્ષણભરનો પણ વિલંબ કર્યા વિના લોકોએ પોતાની મેળે જ માનવ સાંકળ બનાવી દીધી હતી અને હોસ્પિટલ જતી એમ્બ્યુલન્સ માટે ગણતરીની મિનિટોમાં ગ્રીન કોરિડોર જેવો રસ્તો કરી આપ્યો હતો. દર્દીને તાબડતોબ હોસ્પિટલ ખસેડવામાં આવ્યા હતા અને હાલ તેમની સ્થિતિ સંપૂર્ણ સ્થિર હોવાનું જાણવા મળ્યું છે.
સાધુ-સંતોના કરતબો અને સેવાભાવી સંસ્થાઓનું અનોખું યોગદાન
પાવન પર્વ નિમિત્તે વેપારીઓએ બપોર પછી પોતાના ધંધા-રોજગાર સ્વયંભૂ બંધ રાખીને પ્રભુ ભક્તિમાં લીન થયા હતા. રથયાત્રાના સમગ્ર રૂટ પર સેવાભાવી સંસ્થાઓ દ્વારા ઠંડા પાણી, લચ્છી, છાશ અને શરબતના કેન્દ્રો ઊભા કરાયા હતા, જ્યારે લોહાણા વાડી ખાતે હરિભક્તો માટે ભોજન પ્રસાદની સુંદર વ્યવસ્થા કરવામાં આવી હતી. આ દિવ્ય યાત્રામાં જોડાયેલા સાધુ-સંતો અને ગોવાળ સેનાના બાળકોએ વિવિધ અંગ કસરતના પ્રશંસનીય કરતબો દેખાડીને નગરજનોને મંત્રમુગ્ધ કર્યા હતા.
કોમી એકલાસ વચ્ચે સાંજે રથયાત્રા નિજ મંદિર પરત ફરી
અમદાવાદ ગ્રામ્યની આ રથયાત્રાઓએ માત્ર ધાર્મિક જ નહીં પરંતુ સામાજિક એકતાનો પણ મોટો સંદેશ આપ્યો હતો. માર્ગમાં ઠેર-ઠેર હિન્દુ-મુસ્લિમ બિરાદરો દ્વારા રથયાત્રાના મહંતનું ફૂલહારથી ઉષ્માભર્યું સ્વાગત કરવામાં આવ્યું હતું, જેણે પરંપરાગત કોમી એકલાસના દર્શન કરાવ્યા હતા. સમગ્ર દિવસ દરમિયાન ભક્તિમય માહોલ રહ્યા બાદ સાંજે તમામ રથયાત્રાઓ અત્યંત શાંતિપૂર્ણ વાતાવરણમાં નિજ મંદિર ખાતે પરત ફરી હતી.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
