મુખ્ય હાઇલાઇટ્સ:
- બોગસ તબીબની ધરપકડ: થોરખાણ ગામે ડિગ્રી વગર ક્લિનિક ચલાવતા નવનીતભાઈ વિઠ્ઠલભાઈ વૈષ્ણવને પોલીસે ઝડપી લીધા.
- સ્વાસ્થ્ય સાથે ચેડાં: કોઈ પણ મેડિકલ લાયકાત વિના દર્દીઓને એલોપેથીક સારવાર આપતો હતો.
- મુદ્દામાલ: પોલીસે સ્થળ પરથી ૯,૬૦૨ રૂપિયાની કિંમતની એલોપેથીક દવાઓ અને સાધનો જપ્ત કર્યા.
- પોલીસ કાર્યવાહી: એસઓજીની ટીમે મેડિકલ ઓફિસર સાથે રાખીને આ સફળ રેડ કરી હતી.
- આગળની તપાસ: આરોપીને બાબરા પોલીસના હવાલે કરીને કાયદેસરની કાર્યવાહી હાથ ધરવામાં આવી છે.
દર્દીઓના સ્વાસ્થ્ય સાથે ચેડાં કરતા નકલી ડોક્ટર સામે પોલીસની લાલઆંખ, મેડિકલ સાધનો અને દવાઓનો જથ્થો જપ્ત
અમરેલી જિલ્લામાં ગેરકાયદેસર રીતે અને કોઈપણ પ્રકારની માન્ય ડિગ્રી વગર એલોપેથીક પ્રેક્ટિસ કરતા બોગસ તબીબો સામે પોલીસ દ્વારા આકરી કાર્યવાહી કરવામાં આવી રહી છે. ભાવનગર રેન્જ આઈ.જી. આર.વી. અસારી અને અમરેલી પોલીસ અધિક્ષક સંજય ખરાતના માર્ગદર્શન હેઠળ, એસઓજી ટીમે બાતમીના આધારે બાબરા તાલુકાના થોરખાણ ગામે દરોડો પાડીને એક બોગસ ડોક્ટરને મેડિકલ સાધનો અને દવાઓના જથ્થા સાથે રંગેહાથ ઝડપી પાડવામાં સફળતા મેળવી છે.
ઘટનાની વિગત મુજબ, એસઓજી પોલીસને ચોક્કસ માહિતી મળી હતી કે થોરખાણ ગામે નવનીતભાઈ વિઠ્ઠલભાઈ વૈષ્ણવ નામનો શખ્સ કોઈપણ સરકાર માન્ય મેડિકલ ડિગ્રી કે રજિસ્ટ્રેશન વગર ક્લિનિક ચલાવી રહ્યો છે. આ શખ્સ સામાન્ય નાગરિકો અને દર્દીઓના સ્વાસ્થ્ય સાથે ખુલ્લેઆમ ચેડાં કરી એલોપેથીક સારવાર આપી રહ્યો હતો. બાતમી મળતા જ એસઓજીની ટીમે મેડિકલ ઓફિસરને સાથે રાખીને તાત્કાલિક સ્થળ પર દરોડો પાડ્યો હતો. તપાસ દરમિયાન આરોપી નવનીતભાઈ વૈષ્ણવ (ઉંમર ૪૯, રહે. જસદણ) પાસે કોઈ પણ લાયકાત ન હોવાનું બહાર આવ્યું હતું.
પોલીસે સ્થળ પરથી તપાસ હાથ ધરીને વિવિધ પ્રકારની એલોપેથીક દવાઓ તથા મેડિકલ સારવાર માટેના સાધનો મળી કુલ ૧૩ નંગ મુદ્દામાલ કબજે કર્યો હતો, જેની અંદાજિત કિંમત ૯,૬૦૨ રૂપિયા થાય છે. આરોપી વિરુદ્ધ ગુનો નોંધી તેને વધુ કાયદેસરની કાર્યવાહી માટે બાબરા પોલીસ સ્ટેશનને સોંપવામાં આવ્યો છે. આ સમગ્ર ઓપરેશન એસઓજી પોલીસ ઇન્સ્પેક્ટર બી.જી. ઈશરાણીના માર્ગદર્શન હેઠળ પાર પાડવામાં આવ્યું હતું, જેમાં એસઓજીની ટીમ અને મોટા દેવળીયાના મેડિકલ ઓફિસર ડૉ. મીતભાઈ સી. સુરાણીએ મહત્વની ભૂમિકા ભજવી હતી.
અહેવાલ: ભાવેશ વાઘેલા, અમરેલી
About the Author
