મુખ્ય હાઇલાઇટ્સ:
- નબળું આયોજન: કરોડના ખર્ચે બનેલા નવા આરસીસી અને ડામર રોડ તોડીને ગટરલાઇન નાખતા તંત્રની કામગીરી પર સવાલો.
- રસ્તાઓ બેસી ગયા: યોગ્ય પુરાણ ન થતાં માર્ગો ૧ થી ૨ ફૂટ નીચે બેસી જવાથી વાહનચાલકો માટે જોખમી સ્થિતિ.
- મુખ્ય વિસ્તારો પ્રભાવિત: એકલિંગજી રોડ, શુભમ ઇલાઇટ અને ડીમાર્ટ ચોકડી સહિતના વિસ્તારોમાં અવરજવરમાં ભારે હાલાકી.
- ટ્રાફિક સમસ્યા: એક તરફના માર્ગો બંધ થતા સિંગલ પટ્ટી પર ટ્રાફિકનું ભારણ વધ્યું.
- લોકમાગણી: તંત્ર દ્વારા તાત્કાલિક ધોરણે મરામત કરવામાં આવે અને જવાબદારો સામે કાર્યવાહી થાય તેવી માંગ.
સાણંદને સેટેલાઇટ સિટી બનાવવાની મહત્વાકાંક્ષી યોજનાઓ વચ્ચે ઔડાના નબળા અને આયોજનવિહોણા કામકાજે સ્થાનિકો માટે મુસીબત ઊભી કરી છે. કરોડોના ખર્ચે હાલમાં જ તૈયાર કરવામાં આવેલા અત્યાધુનિક માર્ગોને તોડીને ફરીથી ગટરલાઇન નાખવાની કામગીરી શરૂ કરવામાં આવતા લોકોમાં ભારે રોષ જોવા મળી રહ્યો છે. આ આડેધડ ખોદકામને કારણે વરસાદી પાણી ભરાતા અનેક વિસ્તારોમાં રહીશોની હાલત કફોડી બની છે.
આયોજનના અભાવે કરોડોનો વેડફાટ
સાણંદના એકલિંગજી રોડ, શુભમ ઇલાઇટ અને ડીમાર્ટ ચોકડી સહિતના વિસ્તારોમાં ઔડાની કામગીરી પર અનેક સવાલો ઉઠ્યા છે. જે આરસીસી રોડ માંડ ૨૦ દિવસ પહેલા જ તૈયાર થયો હતો, તેને ફરીથી તોડીને ગટરલાઇન નાખવામાં આવી છે. ખોદકામ બાદ માટીનું યોગ્ય પુરાણ ન થતાં રસ્તાઓ ૧ થી ૨ ફૂટ સુધી નીચે બેસી ગયા છે. આ બેદરકારીને લીધે વાહનચાલકો અને સ્થાનિકો માટે જોખમ ઊભું થયું છે.
મુખ્ય માર્ગો પર ખાડા અને પાણીના ખાબોચિયા
એકલિંગજી રોડથી શુભમ ઇલાઇટ અને સોમનાથ બસ સ્ટોપની બાજુની ટીપીથી સુરમ્ય ફ્લેટ તરફ જવાના માર્ગ પર ઠેર-ઠેર મોટા ખાડા પડી ગયા છે. આ ખાડાઓમાં ગોઠણડૂબ પાણી ભરાઈ રહેતા રહીશોની સુરક્ષા માટે એક તરફનો રસ્તો બંધ કરવાની ફરજ પડી છે. આ ઉપરાંત, ડીમાર્ટ ચોકડીથી બાવળા તરફના બાયપાસ રોડ પર ઉમિયા માતાજીના મંદિર સુધી આખો ડામર રોડ ખોદી નાખવામાં આવતા ટ્રાફિક વ્યવસ્થા સંપૂર્ણપણે ખોરવાઈ ગઈ છે. રસ્તો બંધ હોવાથી ભારે વાહનોને સિંગલ પટ્ટી પરથી પસાર થવું પડે છે, જે અકસ્માતને નોતરે છે.
તંત્ર સામે સ્થાનિકોનો આક્રોશ
શહેરના જાગૃત નાગરિકોનું કહેવું છે કે, ઔડાના સત્તાવાળાઓને પ્લાનિંગ વગર કામ કરવાની આદત પડી ગઈ છે. રસ્તાઓ બન્યા બાદ જ ગટરલાઇનનું કામ સૂઝવું તે તંત્રની લાપરવાહી દર્શાવે છે. પ્રજાના ટેક્સના પૈસાનો આ પ્રકારે વેડફાટ અટકાવવો જોઈએ. ચૂંટાયેલા પ્રતિનિધિઓએ આ ગંભીર મુદ્દાને ઉચ્ચકક્ષાએ રજૂ કરીને તાત્કાલિક ધોરણે રસ્તાઓની મરામત કરાવવી જોઈએ, જેથી નાગરિકોને હાલાકીમાંથી મુક્તિ મળે.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
