મુખ્ય હાઇલાઇટ્સ:
- ૧૪૯મી રથયાત્રાની તૈયારીઓ: અષાઢી સુદ બીજ (૧૬ જુલાઈ, ૨૦૨૬)ના રોજ યોજાનારી રથયાત્રા માટે મેયર હિતેશભાઈ બારોટની અધ્યક્ષતામાં એકતા સમિતિની બેઠક સંપન્ન.
- ડીજે અને સાઉન્ડ સિસ્ટમ પર પ્રતિબંધ: રથયાત્રાના રૂટ પર હાથીઓની સુરક્ષા અને શાંતિ માટે ઊંચા અવાજવાળા ડીજે વગાડવા પર પ્રતિબંધ.
- હાઇટેક સુરક્ષા અને પાવર બેકઅપ: સમગ્ર રૂટ પર ઝીણવટભર્યા સીસીટીવી કેમેરા, ૭૩૦ વીજ થાંભલા, ૫૬૦ ફલડ લાઈટ્સ અને ૧૧ અદ્યતન યુપીએસ સિસ્ટમ કાર્યરત રહેશે.
- તંત્ર એલર્ટ મોડ પર: રથયાત્રાના રૂટ પરથી જર્જરિત મકાનો હટાવવા, ૧૦૧ ટ્રકો માટે પાણી, સતત સફાઈ અને ગટર લાઈનો સાફ કરવા કડક આદેશ.
- સાણંદમાં મિશન ગ્રીન ગુજરાત: વન વિભાગ, વહીવટી તંત્ર અને શાળાઓના સહયોગથી વિદ્યાર્થીઓ ચોમાસામાં ૧ લાખ ‘સીડબોલ’ તૈયાર કરી પર્યાવરણ સંરક્ષણનો નવો ઈતિહાસ રચશે.
અમદાવાદ: આગામી અષાઢી સુદ બીજ, તારીખ ૧૬ જુલાઈ, ૨૦૨૬ના રોજ યોજાનારી ભગવાન જગન્નાથજીની ૧૪૯મી રથયાત્રાને શાંતિપૂર્ણ, સુવ્યવસ્થિત અને સૌહાર્દપૂર્ણ વાતાવરણમાં સંપન્ન કરવાના હેતુથી અમદાવાદ મ્યુનિસિપલ કોર્પોરેશન દાણાપીઠ ખાતે આજે શહેર એકતા સમિતિની બેઠક યોજાઈ હતી. અમદાવાદના મેયર હિતેશભાઈ બારોટની અધ્યક્ષતામાં યોજાયેલી આ બેઠકમાં પોલીસ વિભાગ, મ્યુનિસિપલ કોર્પોરેશનના અધિકારીઓ, જગન્નાથ મંદિરના મહંતશ્રી, ધારાસભ્યો અને વિવિધ સમાજના આગેવાનોએ ઉપસ્થિત રહી રથયાત્રાના સફળ આયોજન માટે વિસ્તૃત ચર્ચા-વિચારણા કરી હતી. આ બેઠકમાં રથયાત્રા દરમિયાન શહેરમાં કોમી એકતા, ભાઈચારો અને શાંતિ જળવાઈ રહે તે માટે તમામ વિભાગો વચ્ચે અસરકારક સંકલન સુનિશ્ચિત કરવા પર વિશેષ ભાર મૂકવામાં આવ્યો હતો.
હાથીઓની સુરક્ષા માટે ડીજે પર પ્રતિબંધ અને ચુસ્ત ટ્રાફિક આયોજન
મેયર હિતેશભાઈ બારોટે જણાવ્યું હતું કે, રથયાત્રા પૂર્વે તમામ વ્યવસ્થાઓનું સ્થળ પર નિરીક્ષણ કરવામાં આવશે. આ વર્ષે ખાસ કરીને જગન્નાથ મંદિર ટ્રસ્ટના સૂચનોને ધ્યાનમાં રાખીને રથયાત્રા દરમિયાન હાથીઓને કોઈપણ પ્રકારની મુશ્કેલી ન પડે તે માટે ખાસ તકેદારી રાખવામાં આવશે. હાથીઓ પસાર થાય ત્યારે ડીજે અથવા ઊંચા અવાજના સાઉન્ડ સિસ્ટમનો ઉપયોગ કરવા પર પ્રતિબંધ રહેશે અને અનાવશ્યક ઘોંઘાટ ટાળવા જરૂરી સૂચનાઓ આપવામાં આવી છે. આ ઉપરાંત, રથ પરત ફરતી વખતે જમાલપુર વિસ્તારમાં ટ્રાફિક વ્યવસ્થાને વધુ અસરકારક બનાવવામાં આવશે જેથી રથનો કાફલો નિર્વિઘ્ન પસાર થઈ શકે. ગત વર્ષોના અનુભવના આધારે લાઇટિંગ, સફાઈ અને પાવર સપ્લાયની આધુનિક વ્યવસ્થાઓ ગોઠવવામાં આવી છે.
હાઇટેક સુરક્ષા અને સુવિધાઓથી સજ્જ હશે રથયાત્રાનો રૂટ
રથયાત્રાના સુચારૂ આયોજન માટે સમગ્ર રૂટ પર ક્લોઝ સર્કિટ કેમેરા (સીસીટીવી) કાર્યરત રાખવામાં આવશે. આ સાથે ૧૦૧થી વધુ ટ્રકો માટે સમયસર પાણીની વ્યવસ્થા, જર્જરિત મકાનો ઉતારી લેવા, સતત સફાઈ અને ફાયર બ્રિગેડની તૈનાતી કરવામાં આવશે. રૂટ પર ખલાસીઓને વિશેષ ઓળખપત્ર (આઈ-કાર્ડ) આપવામાં આવશે. સમગ્ર રૂટ પર વીજળીની અવિરત સુવિધા માટે ૭૩૦ વીજ થાંભલા, ૫૬૦ ફલડ લાઈટ્સ અને ૧૧ અનઇન્ટરપ્ટેડ પાવર સપ્લાય (યુપીએસ) સિસ્ટમ ગોઠવવામાં આવી છે, તેમજ ટોરેન્ટ પાવરના ૩૩ કર્મચારીઓ સતત તૈનાત રહેશે. આ બેઠકમાં ધારાસભ્ય કૌશિકભાઈ જૈન, ડૉ. પાયલબેન કુકરાણી, મ્યુનિસિપલ કમિશનર બંછાનિધિ પાની અને પોલીસ કમિશનર અનુપમસિંહ ગેહલોત સહિતના ઉચ્ચ અધિકારીઓ ઉપસ્થિત રહ્યા હતા.
સાણંદના વિદ્યાર્થીઓ ચોમાસામાં રચશે હરિત ક્રાંતિ: ૧ લાખ ‘સીડબોલ’ બનાવવાનું મહાઅભિયાન
બીજી તરફ, ગુજરાત સરકારના “મિશન ગ્રીન ગુજરાત’ અને પર્યાવરણ સંરક્ષણના અભિયાનને વેગ આપવા માટે સાણંદમાં એક પ્રેરણાદાયી ભવ્ય મહાઅભિયાન શરૂ કરવામાં આવ્યું છે. સાણંદ તાલુકા વહીવટી તંત્ર, શિક્ષણ વિભાગ અને વન વિભાગના સક્રિય સહયોગથી આ સરાહનીય લોકભાગીદારીનું ઉદાહરણ સામે આવ્યું છે. સ્થાનિક વનવિભાગ અને માનવ સેવા ટ્રસ્ટના સંયુક્ત ઉપક્રમે તાલુકાની વિવિધ સરકારી અને ખાનગી શાળાઓના વિદ્યાર્થીઓને જોડીને ચાલુ ચોમાસા દરમિયાન ૧ લાખ સીડબોલ (બીજ ધરાવતા માટીના દડા) તૈયાર કરવાનું અભિયાન શરૂ કરાયું છે, જે પર્યાવરણ સુધારણામાં મોટું યોગદાન આપશે.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
