મુખ્ય હાઇલાઇટ્સ:
- નવ મહિનાની શોધનો અંત: મહારાષ્ટ્રના પાલઘર જિલ્લાના તલાસરીથી ગુમ થયેલી જાગૃતિબેન નામની મહિલાનું ગુજરાતની લાઠી પોલીસે પરિવાર સાથે કરાવ્યું સુખદ મિલન.
- પેટ્રોલિંગ દરમિયાન મળી આવ્યા: લાઠી-ચાવંડ રોડ પર રાત્રિ પેટ્રોલિંગ દરમિયાન લાઠી પોલીસની ટીમને શંકાસ્પદ હાલતમાં મળી આવ્યા હતા બહેન.
- એક જ શબ્દ આપ્યો કડી: માનસિક અસ્વસ્થતાના કારણે સરનામું ન કહી શકતી મહિલા વારંવાર ‘તલાસરી’ બોલતી હતી, જેના આધારે પોલીસે મૂળ વતન શોધી કાઢ્યું.
- સુરક્ષિત આશ્રય: કાયદાકીય પ્રક્રિયા પૂર્ણ થાય ત્યાં સુધી મહિલાને અમરેલીના ‘સખી વન સ્ટોપ સેન્ટર’ ખાતે સુરક્ષિત આશ્રય આપવામાં આવ્યો હતો.
લાઠી પોલીસનો સંવેદનશીલ અભિગમ, પત્રકાર ભવેષ વાઘેલાનો ખાસ અહેવાલ
અમરેલી: અમરેલી જિલ્લાની લાઠી પોલીસનો એક પ્રશંસનીય અને માનવીય અભિગમ સામે આવ્યો છે. લાઠી પોલીસની ત્વરિત સતર્કતા અને સંવેદનશીલ કામગીરીના કારણે મહારાષ્ટ્રના પાલઘર જિલ્લા હેઠળ આવતા તલાસરી પંથકમાંથી છેલ્લા નવ મહિનાથી ગુમ થયેલી એક મહિલાનું તેમના પરિવાર સાથે અત્યંત ભાવુક પુનઃમિલન શક્ય બન્યું છે. દીકરી જીવતી હોવાના સમાચાર અને નવ મહિના બાદ તેને સહીસલામત નજર સામે જોતા પિતાની આંખોમાંથી આસુ સરી પડ્યા હતા. પોલીસની આ ઉમદા કામગીરીની આખા પંથકમાં અને ઉચ્ચ પોલીસ અધિકારીઓ દ્વારા મુક્તકંઠે પ્રશંસા કરવામાં આવી રહી છે.
રાત્રિ પેટ્રોલિંગ દરમિયાન શંકાસ્પદ હાલતમાં મળી આવ્યા, પોલીસે વહાલ સોઈ પૂછપરછ કરી
ઘટનાની વિગતવાર માહિતી મુજબ, ગત તારીખ ૨૯ જૂન ૨૦૨૬ના રોજ રાત્રિના સમયે લાઠી પોલીસ સ્ટેશનના ટાઉનબીટ ઇન્ચાર્જ કે.કે. રાઠોડ, એચ.એન. ખુમાણ અને પી.એસ. ચૌહાણ સહિતનો સ્ટાફ લાઠી-ચાવંડ રોડ પર નિયમિત પેટ્રોલિંગમાં હતો. આ દરમિયાન રોડની સાઇડમાં એક અજાણી મહિલા એકલવાઈ અને શંકાસ્પદ હાલતમાં મળી આવતા પોલીસ ટીમે ગાડી ઉભી રાખીને તેની પૂછપરછ કરી હતી. પ્રાથમિક વાતચીતમાં જ પોલીસને સમજાયું હતું કે આ મહિલા માનસિક રીતે અસ્વસ્થ છે અને પોતાનું નામ કે પૂરું સરનામું જણાવી શકવાની સ્થિતિમાં નથી. જો કે, તે વારંવાર રડતા-રડતા ‘તલાસરી’ શબ્દનું ઉચ્ચારણ કરતી હતી.
ટેકનોલોજી અને હ્યુમન સોર્સના ઉપયોગથી મહારાષ્ટ્રના પાલઘર પોલીસ સ્ટેશનનો સંપર્ક કરાયો
લાઠી પોલીસની ટીમે સમય સૂચકતા વાપરીને તુરંત જ ઇન્ટરનેટ અને ડિજિટલ ટેકનોલોજીનો ઉપયોગ કરી ‘તલાસરી’ નામનું સ્થળ ક્યાં આવ્યું છે તેની શોધખોળ આદરી હતી. તપાસ કરતા માલૂમ પડ્યું હતું કે આ સ્થળ મહારાષ્ટ્રના પાલઘર જિલ્લામાં આવેલું છે. પોલીસે તે વિસ્તારના કેટલાક જાણીતા સ્થળોના ફોટોગ્રાફ્સ મોબાઇલમાં ઓનલાઇન ડાઉનલોડ કરીને મહિલાને બતાવતા જ તેણે તે પોતાનું વતન હોવાની ઓળખ આપી હતી. ત્યારબાદ લાઠી પોલીસે કોઈ પણ ક્ષણનો વિલંબ કર્યા વિના મહારાષ્ટ્રના તલાસરી પોલીસ સ્ટેશનનો સત્તાવાર સંપર્ક સાધ્યો હતો. ત્યાંથી પાકી વિગત મળી હતી કે જાગૃતિબેન નામની આ મહિલા છેલ્લા નવ મહિનાથી પોતાના ઘરેથી ગુમ છે અને તેનો પરિવાર તેની શોધખોળ કરી રહ્યો છે.
પિતા શંકરભાઈ દીકરીને લેવા અમરેલી દોડી આવ્યા, સખી વન સ્ટોપ સેન્ટર ખાતેથી સોંપણી કરાઈ
જાગૃતિબેન સહીસલામત ગુજરાતના અમરેલી જિલ્લામાં હોવાની જાણ થતાં જ મહારાષ્ટ્રમાં રહેતા તેમના પિતા શંકરભાઈ વનશ્યાભાઈ વળવીના વ્યાકુળ હૃદયને મોટી શાંતિ મળી હતી અને આખો પરિવાર ખુશીથી ઝૂમી ઉઠ્યો હતો. કાનૂની પ્રક્રિયા ચાલુ હોવાથી જાગૃતિબેનને અમરેલીના ‘સખી વન સ્ટોપ સેન્ટર’ ખાતે સંપૂર્ણ સુરક્ષિત આશ્રયમાં રાખવામાં આવ્યા હતા. આજે તારીખ ૧ જુલાઈ ૨૦૨૬ના રોજ લાઠી પોલીસ સ્ટેશનના પોલીસ ઇન્સ્પેક્ટર એમ.બી.ઔસુરાના કુશળ માર્ગદર્શન હેઠળ તમામ કાયદાકીય અને કાગળિયાની કાર્યવાહી પૂર્ણ કરીને જાગૃતિબેનને તેમના પિતા શંકરભાઈને સુપરત કરવામાં આવ્યા હતા. નવ મહિનાના લાંબા વિરહ બાદ પિતા-પુત્રીનું આ મિલન જોઈને ત્યાં હાજર તમામ પોલીસ કર્મીઓની આંખો પણ ભીની થઈ ગઈ હતી.
અહેવાલ ભાવેશ વાઘેલા, અમરેલી
About the Author
