મુખ્ય હાઇલાઇટ્સ:
- તંત્રની જોહુકમી: જે ખેડૂતોના ખેતરમાંથી ગેસ લાઇન પસાર જ નથી થતી, તેમના સાતબારના ઉતારામાં પણ બોજો પાડી દેવાયો.
- ૮થી વધુ ગામો એકજૂથ: સરગવાળા, ભોળાદ, અરણેજ, કોઠ સહિતના ગામોના ખેડૂતો અને મહિલાઓ ખેતરમાં મંડપ બાંધી રાત-દિવસ અડિંગો જમાવી બેઠા.
- અનોખી ગાંધીચીંધી શૈલી: હિંસા કે ઉગ્ર સૂત્રોચ્ચારને બદલે મહિલાઓ તાળીઓ પાડી, રામધૂન અને ભજન કીર્તન ગાઈને વિરોધ નોંધાવી રહી છે.
- મધ્યસ્થીની માંગ: વહીવટી તંત્ર અને કંપનીની મિલીભગત સામે અમદાવાદ જિલ્લા કલેક્ટર અને સ્થાનિક ધારાસભ્ય તાકીદે ન્યાય અપાવે તેવી માંગ.
પૂરતા વળતર અને સહમતિ વિના જ ખેતરોમાં જેસીબી મશીનો ઉતારી દેવાયા
ધોળકા તાલુકાના સરગવાળા ગામમાં જીએસપીએલ કંપનીની ગેસ પાઈપલાઈનની કામગીરી સામે ખેડૂતોનું વિરોધ પ્રદર્શન મંગળવારે પાંચમાં દિવસમાં પ્રવેશ્યું છે. કંપની અને સરકારી તંત્ર દ્વારા પૂરતા વળતર અને ખેડૂતોની યોગ્ય સહમતિ વિના જ ખેતરોમાં ગેરકાયદેસર રીતે જેસીબી મશીનો ઉતારી દેવામાં આવ્યા છે. આટલું જ નહીં, જમીનના સાતબાર (૭/૧૨)ના ઉતારામાં વહીવટી તંત્ર દ્વારા ‘બોજો’ પાડી દેવાતાં ગ્રામજનોમાં ભારે રોષ જોવા મળી રહ્યો છે. કંપની અને તંત્રના આ મનસ્વી વલણ સામે સરગવાળા ઉપરાંત ભોળાદ, અરણેજ, કોઠ, ભાયલા, ગાંગડ, સમાણી અને જવારજ સહિત આસપાસના ૮થી વધુ ગામના ખેડૂતો હવે એકજૂથ થઈને ન્યાયની લડત માટે મેદાને ઉતર્યા છે.
રામધૂન અને ભજન કીર્તન સાથે મહિલાઓનો અનોખો સત્યાગ્રહ
છેલ્લા પાંચ દિવસથી ખેડૂતો અને મહિલાઓ ખેતરમાં જ મોટો મંડપ બાંધીને રાત-દિવસ અડિંગો જમાવીને બેઠા છે. આ આંદોલનની ખાસ વાત એ છે કે, હિંસા કે ઉગ્ર સૂત્રોચ્ચાર કરવાને બદલે, આંદોલનકારી મહિલાઓ હાથમાં તાળીઓ પાડી, રામધૂન અને ભજન કીર્તન ગાઈને એકદમ શાંતિપૂર્ણ અને અનોખી શૈલીમાં પોતાનો વિરોધ નોંધાવી રહી છે. ખેડૂતોને મોટી ભીતિ છે કે ગેસ લાઈન પસાર થવાથી ભવિષ્યમાં તેમની ફળદ્રુપ જમીન કાયમી ધોરણે નકામી બની જશે, કારણ કે ત્યાં ભવિષ્યમાં કોઈ ખોદકામ કે નવો બોર બનાવવાની મંજૂરી મળશે નહીં. વારંવારની રજૂઆતો છતાં સત્તાધીશો ખેડૂતોની વેદના સાંભળવાને બદલે પોલીસ પ્રોટેક્શનના જોરે બળપૂર્વક કામ કરાવી રહ્યા હોવાના આક્ષેપ ઉઠ્યા છે.
તંત્રની ગંભીર બેદરકારી: લાઇન વગરની જમીનો પર પણ રાતોરાત બોજો ચડી ગયો
ખેડૂતોએ સરકારી તંત્ર અને ગેસ કંપનીની મિલીભગત સામે અત્યંત ગંભીર આક્ષેપો કર્યા છે. ખેડૂતોના જણાવ્યા મુજબ, વહીવટી તંત્રની ઘોર બેદરકારી અથવા જોહુકમીની હદ તો ત્યાં આવી ગઈ છે કે જે ખેડૂતોના ખેતરમાંથી ગેસ લાઇન પસાર જ નથી થવાની, તેવા નિર્દોષ ખેડૂતોની જમીનના સાતબારના ઉતારામાં પણ સરકારી ચોપડે બોજો પાડી દેવામાં આવ્યો છે. તંત્રની આ ભયાનક ભૂલના કારણે ખેડૂતો પોતાની જ માલિકીની જમીન પરના અધિકારો ગુમાવી રહ્યા હોવાનો ભય સતાવી રહ્યો છે. ખેડૂતોની ઉગ્ર માંગ છે કે અમદાવાદ જિલ્લા કલેક્ટર અને સ્થાનિક ધારાસભ્ય આ સંવેદનશીલ મામલે તાકીદે વચગાળાનો રસ્તો કાઢી મધ્યસ્થી કરે અને જગતના તાતને ન્યાય અપાવે.
આંદોલન પર ઉતરેલા ખેડૂતોની મુખ્ય ૪ માંગણીઓ:
૧. રૂટ બદલવામાં આવે: ગેસ પાઈપલાઈન ખેડૂતોના ફળદ્રુપ અને કિંમતી ખેતરોના બદલે સરકારી રોડની સાઈડમાંથી પસાર કરવામાં આવે જેથી કૃષિ જમીનને નુકસાન ન થાય.
૨. યોગ્ય અને બજારભાવનું વળતર: જમીન સંપાદન સામે અસરગ્રસ્ત ખેડૂતોને કાયદાકીય જોગવાઈ મુજબ વર્તમાન બજારભાવ પ્રમાણે પૂરતું અને યોગ્ય વળતર ચૂકવવામાં આવે.
૩. લેખિત સહમતિ અનિવાર્ય: ખેડૂતોની કાયદેસરની લેખિત સહમતિ મેળવ્યા વિના ખેતરોમાં કોઈપણ પ્રકારની કામગીરી કે ખોદકામ કરવામાં ન આવે.
૪. ગેરકાયદેસર બોજો હટાવો: જે ખેડૂતોના ખેતરમાંથી ગેસ લાઈન પસાર જ નથી થતી, તેમના સાતબારના ઉતારામાંથી વહીવટી તંત્ર દ્વારા ગેરકાયદેસર રીતે પાડેલો ‘બોજો’ તાત્કાલિક અસરથી દૂર કરવામાં આવે.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
