મુખ્ય હાઇલાઇટ્સ:
- પ્રશંસક બનીને કાવતરું: ‘તમે ખેડૂતો માટે સારું કામ કરો છો’ કહી અજાણ્યા શખ્સોએ ફોન કરીને મુલાકાત માટે બોલાવ્યા.
- ચાલતી ગાડીમાં હુમલો: ચા-નાસ્તો કરાવવાના બહાને કારમાં બેસાડી મોબાઈલ આંચક્યો અને છરીના ૧૭ ઘા ઝીંક્યા.
- હિંમતભેર બચાવ: ચાલતી કારનું સ્ટેરિંગ પકડી ગાડી રોકાવી અને પાછળથી આવતી રિક્ષાની મદદથી જીવ બચાવ્યો.
- રાજકીય ષડયંત્રનો આક્ષેપ: ૧૧ દિવસના ડ્રેનેજ લાઈન આંદોલનની સફળતા બાદ સાણંદના બે રાજકીય અગ્રણીઓ સામે આંગળી ચિંધાઈ.
ખેડૂત આંદોલનના અગ્રણી પર કાવતરું ઘડીને જીવલેણ હુમલો કરાયો
સાણંદ અને બાવળા પંથકમાં ખેડૂતોના પ્રશ્નો માટે અવાજ ઉઠાવનાર અને ખેડૂત આંદોલનને સક્રિય રાખવામાં મહત્વની ભૂમિકા ભજવનાર અગ્રણી શૈલેષભાઈ મેર પર બે અજાણ્યા શખ્સોએ ફિલ્મી ઢબે અપહરણ કરી, છરી વડે જીવલેણ હુમલો કરતા સમગ્ર પંથકમાં ભારે ચકચાર મચી ગઈ છે. સાણંદના ડરણ ગામે ૨૯મી તારીખે ખેડૂતોની એક મહત્વની સભા પૂરી કરીને શૈલેષભાઈ સાંજના સમયે પોતાના મોટરસાયકલ પર કેરાળા જવા નીકળ્યા હતા. ઢેઢાળ ચોકડીએથી તેમના સાથી લક્ષ્મણભાઈ છૂટા પડ્યા બાદ, શૈલેષભાઈના ફોન પર એક અજાણ્યા નંબર પરથી કોલ આવ્યો હતો. ફોન કરનારે વહેવારુ થઈને જણાવ્યું કે, “હું તમારો મોટો પ્રશંસક છું, તમે ખેડૂતો માટે ખૂબ જ સારું કામ કરો છો અને મારે તમને રૂબરૂ મળવું છે.”
ચા-નાસ્તો કરવાના બહાને કારમાં બેસાડ્યા અને શરૂ થઈ ઝપાઝપી
ભોળાભાવે શૈલેષભાઈ આ અજાણ્યા શખ્સોને મળવા માટે રૂપાલ ચોકડી પાસે આવેલા ગોવાળિયા ટી સ્ટોલ પર પહોંચ્યા હતા. ત્યાં ૨૫ થી ૩૦ વર્ષના બે અજાણ્યા યુવકો નંબર પ્લેટ વિનાની સફેદ બ્રેઝા કાર સાથે ઊભા હતા, જેના પર ‘રામાધણી’ લખેલું હતું. આ શખ્સોએ પહેલા વિશ્વાસ જીતવા પશુના ખોળનો કોથળો ગાડીમાં મૂકી શૈલેષભાઈને ઘરે પહોંચાડ્યા હતા અને ત્યારબાદ ચા-નાસ્તો કરવાના બહાને તેમને કારની પાછળની સીટમાં બેસાડી દીધા હતા. કાર નળસરોવર ચોકડી તરફ આગળ વધી રહી હતી ત્યારે જ ડ્રાઈવરની બાજુમાં બેઠેલો શખ્સ અચાનક પાછળની સીટ પર આવી ગયો હતો અને શૈલેષભાઈનો મોબાઈલ આંચકી ઝપાઝપી શરૂ કરી દીધી હતી.
ખેડૂત નેતાની સમયસૂચકતા અને રિક્ષાચાલકની મદદથી જીવ બચ્યો
ચાલતી ગાડીમાં મોત સામે દેખાતા શૈલેષભાઈએ અપ્રતિમ હિંમત બતાવી હતી. તેમણે પોતાનો જીવ બચાવવા આગળ કૂદીને કારનું સ્ટેરિંગ પકડી લીધું, જેના કારણે કાર ત્યાં જ રોકાઈ ગઈ હતી. જોકે, આ દરમિયાન પાછળ રહેલા હુમલાખોરે તીક્ષ્ણ છરી કાઢીને શૈલેષભાઈના ડાબા હાથના કાંડા પર આડેધડ ઝીંકી દીધી હતી. શૈલેષભાઈની ચીસાચીસ અને બૂમાબૂમ સાંભળીને પાછળથી આવી રહેલી એક રિક્ષા આડી ઊભી રહી ગઈ હતી. મોકો જોઈને શૈલેષભાઈ કારમાંથી બહાર કૂદી પડ્યા હતા અને રિક્ષાનું કેરિયર પકડી લીધું હતું. આ જોઈને હુમલાખોરો પોતાની કાર ભગાડીને નાસી છૂટ્યા હતા. લોહીલુહાણ હાલતમાં શૈલેષભાઈને તાત્કાલિક હોસ્પિટલ ખસેડાયા હતા, જ્યાં તેમના હાથે ૧૭ ટાંકા આવ્યા છે.
હોસ્પિટલ અને પોલીસ સ્ટેશને ખેડૂતોના ધાડેધાડા ઉમટ્યા, તપાસ શરૂ
આ હુમલાના સમાચાર વાયુવેગે પ્રસરતા જ ડરણ સહિતના આસપાસના ગામોમાંથી ૩૦૦થી વધુ ખેડૂતોના ટોળેટોળાં હોસ્પિટલ અને કેરાળા જીઆઈડીસી પોલીસ સ્ટેશને ઉમટી પડ્યા હતા. ખેડૂતોમાં ભારે આક્રોશ જોવા મળી રહ્યો છે અને પોલીસે આ મામલે ગુનો નોંધી આરોપીઓને ઝડપી પાડવા માટે ચક્રો ગતિમાન કર્યા છે.
હુમલા પાછળ સાણંદના બે રાજકીય અગ્રણીઓનું ષડયંત્ર હોવાનો આક્ષેપ
સાણંદના ડરણ ગામે ખેતરોમાંથી નીકળતી ડ્રેનેજ લાઈન સામે ખેડૂતોનું ૧૧ દિવસ સુધી ઉગ્ર આંદોલન ચાલ્યું હતું, જેમાં શૈલેષ મેર મુખ્ય ભૂમિકામાં હતા. આ આંદોલન સફળ રહ્યું હતું અને તંત્ર પાસેથી લેખિત બાહેંધરી મેળવ્યા બાદ સભા સંબોધીને પરત ફરી રહેલા શૈલેષભાઈ પર આ હુમલો થયો હોવાથી તેમણે તેને રાજકીય ગણાવ્યો છે. હોસ્પિટલના બિછાનેથી આક્રોશ વ્યક્ત કરતા શૈલેષભાઈએ સીધો આક્ષેપ કર્યો છે કે આ આંદોલનની સફળતા પચાવી ન શકતા સાણંદ તાલુકાના બે મોટા રાજકીય અગ્રણીઓએ ભેગા મળીને તેમનો કાંટો કાઢી નાખવા માટે આ જીવલેણ ષડયંત્ર રચ્યું હતું.
અહેવાલ:ગાંધીનગર પ્રવાસી પત્રકાર રાજેશ પરીખ
About the Author
