મુખ્ય હાઇલાઇટ્સ:
- મોટી લાઇનની માંગ: અમરેલીથી વિસાવદર સુધી બ્રોડગેજ રેલવે લાઇન શરૂ કરવા ધારી પત્રકાર સંઘ દ્વારા ગાંધી ચીંધ્યા માર્ગે જનજાગૃતિ અભિયાન તેજ કરાયું.
- પ્રતિમા પૂજન: મહારાજા સયાજીરાવ ગાયકવાડ, ભીમરાવ આંબેડકર અને સરદાર પટેલની પ્રતિમાઓને હારતોરા કરી શંખનાદ ફૂંકાયો.
- નબાપરાનું આમંત્રણ: સ્થાનિક પચાસથી વધુ નાગરિકોએ મિશનને ટેકો આપી નબાપરા વિસ્તારમાં સભા યોજવા પત્રકાર સંઘને આવકાર્યા.
- વેપાર અને જોડાણ: સુરત અને અમદાવાદ જેવા મહાનગરો સાથે ધારી, ચલાલા અને વિસાવદર પંથકની જનતાને સીધી કનેક્ટિવિટી આપવા નગરપાલિકા સદસ્યની માંગ.
- ધાર્મિક પ્રવાસનને લાભ: તુલસીશ્યામ, સતાધાર અને ખોડિયાર મંદિર જેવા તીર્થસ્થાનોમાં પ્રવાસીઓ વધશે તેમજ હાઈવે પર વાહનોનું ભારણ અને અકસ્માતો ઘટશે.
મહાપુરુષોને વંદન: મહારાજા સયાજીરાવ, બાબાસાહેબ આંબેડકર અને સરદાર પટેલની પ્રતિમાઓ સમક્ષ લીધા સંકલ્પ
અમરેલીથી વિસાવદર સુધી મોટી રેલવે લાઇન (બ્રોડગેજ) ની સુવિધા શરૂ કરવાની વ્યાજબી માંગ સાથે ધારી પત્રકાર સંઘ દ્વારા એક મોટું જનજાગૃતિ અભિયાન હાથ ધરવામાં આવ્યું છે. લાખો લોકોનું સપનું સાકાર થાય તે માટે પત્રકાર સંઘ દ્વારા ગાંધી ચીંધ્યા માર્ગે આંદોલન આગળ ધપાવવામાં આવી રહ્યું છે. આ કડીમાં સવારે ૧૦:૦૦ વાગ્યે મહારાજા સયાજીરાવ ગાયકવાડની પ્રતિમાને જળ સ્નાન કરાવી, ફૂલહાર પહેરાવીને શંખનાદ સાથે કાર્યક્રમની શરૂઆત કરવામાં આવી હતી. ત્યારબાદ સંવિધાનના ઘડવૈયા ભીમરાવ આંબેડકર તેમજ લોખંડી પુરુષ સરદાર વલ્લભભાઈ પટેલની પ્રતિમા ખાતે પણ ભવ્ય પુષ્પાંજલિ અર્પણ કરવામાં આવી હતી. આ બિનરાજકીય મિશનમાં સામાજિક અગ્રણી હરેશભાઈ મકવાણા, નગરપાલિકાના સદસ્ય બાલાભાઈ વાડદોરીયા, ગૌતમભાઈ દાફડા, જીતુભાઈ જયસ્વાલ તથા બજરંગ ગ્રુપના પ્રમુખ પરેશભાઈ પટ્ટણી સહિત મોટી સંખ્યામાં જાગૃત નાગરિકો જોડાયા હતા.
જનસમર્થનનો જુવાળ: નબાપરા વિસ્તારના લોકોએ આપ્યું જનજાગૃતિ સભાનું ભાવભીનું આમંત્રણ
આ અભિયાનને જનતાનો પણ બહોળો પ્રતિસાદ મળી રહ્યો છે. નબાપરા વિસ્તારમાં આવેલી સરદાર વલ્લભભાઈ પટેલની પ્રતિમા પાસે આશરે પચાસ જેટલા સ્થાનિક નાગરિકો એકઠા થયા હતા અને તેમણે આ રેલવે મિશનને પોતાનું સંપૂર્ણ સમર્થન જાહેર કર્યું હતું. એટલું જ નહીં, સ્થાનિકોએ નબાપરા વિસ્તારમાં પણ એક મોટી જનજાગૃતિ સભા યોજવા માટે પત્રકાર સંઘને આમંત્રણ આપ્યું છે, જે અંગેની આગામી રૂપરેખા પત્રકાર સંઘ દ્વારા ટૂંક સમયમાં જાહેર કરવામાં આવશે.
વેપાર-ઉદ્યોગનો વિકાસ: મોટા શહેરો સાથે જોડાણથી ધારી-ચલાલા પંથકને મોટો ફાયદો થશે
ધારી નગરપાલિકાના સદસ્ય બાલાભાઈ વાડદોરીયાએ આ અભિયાનમાં હાજરી આપીને જણાવ્યું હતું કે, જો અમરેલીથી વિસાવદર સુધી મોટી રેલવે લાઇન મંજૂર કરવામાં આવે, તો વેપાર અને સામાજિક વ્યવહાર બંને માટે સુરત અને અમદાવાદ જેવા મોટા શહેરો સાથે સીધું જોડાણ મળશે. ખાસ કરીને ધારી, ચલાલા અને વિસાવદર પંથકના હજારો લોકો લાંબા સમયથી આ સુવિધા ઝંખી રહ્યા છે. ગીર વિસ્તારના સર્વાંગી વિકાસ માટે અને ધાર્મિક પ્રવાસનને વેગ આપવા માટે આ રેલવે લાઇન વહેલામાં વહેલી તકે શરૂ થાય તે ખૂબ જ જરૂરી છે.
પ્રવાસનધામોને મળશે વેગ: ધોરીમાર્ગો પર અકસ્માતો ઘટશે અને ટ્રાફિકની સમસ્યા હળવી થશે
બીજી તરફ, સામાજિક અગ્રણી હરેશભાઈ મકવાણાએ જણાવ્યું હતું કે મોટી રેલવે લાઇન આવવાથી ગીર વિસ્તારના પ્રવાસનધામો જેવા કે આંબરડી સિંહ સદન, ગળધરા ખોડિયાર મંદિર, તુલસીશ્યામ ગીર, સતાધાર અને પરબધામ જેવા ધાર્મિક સ્થળોએ દેશભરમાંથી પ્રવાસીઓ સરળતાથી આવી શકશે. વધુમાં, લાખો લોકો રેલવે સેવાનો લાભ લેશે, જેના કારણે ધોરીમાર્ગો (હાઈવે) પર વાહનોનું ભારણ ઘટશે અને અકસ્માતોની ઘટનાઓમાં મોટો ઘટાડો નોંધાશે, જે સામાન્ય જનતા માટે આશીર્વાદરૂપ સાબિત થશે.
અહેવાલ: રિપોર્ટર, બિપીન રાઠોડ ચલાલા… અમરેલી
About the Author
