મુખ્ય હાઇલાઇટ્સ:
- પોલીસ કમિશનરનું જાહેરનામું: મહાનગરપાલિકાની નિષ્ફળતા વચ્ચે પોલીસ વડા જી. એસ. મલિકે કાયદો હાથમાં લઈ પશુ માલિકોને જેલની ચેતવણી આપી.
- પશુમુક્ત વિસ્તારોની જાહેરાત: રામોલ, વસ્ત્રાલ અને હાથીજણ જેવા વિસ્તારોને પ્રાથમિક તબક્કે સંપૂર્ણ ‘પશુમુક્ત ઝોન’ જાહેર કરાયા.
- આધુનિક ચીપ અને ટેગિંગ: તમામ પશુઓનું ૬૦ દિવસમાં રજીસ્ટ્રેશન કરી ઓળખ માટેની વિશેષ રેડિયો ફ્રિકવન્સી ચીપ લગાવવી ફરજિયાત.
- ઘાસચારા પર પ્રતિબંધ: જાહેર રસ્તાઓ પર ઘાસ વેચવા અને પશુઓને ઘાસ નીરવા (નાખવા) પર સંપૂર્ણ કાયદાકીય પ્રતિબંધ.
- માલિકીની વિગત આપવી જરૂરી: પશુના વેચાણ, ફેરફાર કે મૃત્યુ અંગે મહાનગરપાલિકાને તુરંત જાણ કરવી પડશે.
તંત્ર એક્શન મોડમાં: મહાનગરપાલિકાની નિષ્ફળતા વચ્ચે હવે પોલીસે કમાન સંભાળી
અમદાવાદ શહેરમાં રખડતા ઢોરોના કારણે સર્જાતા અકસ્માતો અને નિર્દોષ નાગરિકોની જાનહાનિના વધતા કિસ્સાઓને રોકવા માટે હવે વહીવટીતંત્ર સંપૂર્ણપણે સક્રિય થયું છે. અમદાવાદ મહાનગરપાલિકા રખડતા પશુઓનો ત્રાસ રોકવામાં નિષ્ફળ રહી હોવાના વ્યાપક આક્ષેપો વચ્ચે હવે શહેર પોલીસ વડાએ પોતે આ ગંભીર મામલે કડક વલણ અપનાવ્યું છે. અમદાવાદ શહેરના પોલીસ કમિશનર જી. એસ. મલિક દ્વારા એક વિશેષ જાહેરનામું બહાર પાડીને બેજવાબદાર પશુ માલિકો સામે કડક કાયદાકીય કાર્યવાહી કરવાની અને જેલ ભેગા કરવાની સીધી ચેતવણી આપવામાં આવી છે. નાગરિકોની સુરક્ષા અને વાહનવ્યવહારની સમસ્યાના કાયમી નિવારણ માટે પોલીસ વડાએ ગુજરાત પોલીસ અધિનિયમ ૧૯૫૧ની કલમ ૩૩(૧) અન્વયે આ સત્તાવાર આદેશ જારી કર્યો છે.
નવા નિયમો: રામોલ, વસ્ત્રાલ અને હાથીજણ સહિતના વિસ્તારો ‘પશુમુક્ત ક્ષેત્ર’ જાહેર
પોલીસ કમિશનરના નવા જાહેરનામા અનુસાર, અમદાવાદના ચોક્કસ વિસ્તારોને સંપૂર્ણપણે ‘પશુ પ્રતિબંધિત ક્ષેત્ર’ અને ‘પશુમુક્ત વિસ્તાર’ તરીકે ઘોષિત કરવામાં આવ્યા છે. પ્રાથમિક તબક્કે શહેરના રામોલ, વસ્ત્રાલ અને હાથીજણ જેવા વિસ્તારોને આ કડક નિયમ હેઠળ આવરી લેવામાં આવ્યા છે. આ ઘોષિત કરાયેલા પ્રતિબંધિત વિસ્તારોમાં કોઈપણ પશુ માલિક પોતાના પશુઓને જાહેરમાં રખડતા મૂકી શકશે નહીં. જો કોઈ પશુ રસ્તા પર જોવા મળશે તો માલિક સામે ગુનો નોંધી જેલભેગા કરવાની તજવીજ હાથ ધરાશે.
ફરજિયાત નોંધણી: ૬૦ દિવસમાં પશુઓ પર રેડિયો તરંગ ઓળખ ચિપ લગાવવી પડશે
જાહેરનામામાં પશુ માલિકો માટે કડક માર્ગદર્શિકા જાહેર કરવામાં આવી છે. જે મુજબ, આગામી ૬૦ દિવસની અંદર તમામ પશુ માલિકોએ પોતાના પશુઓની ફરજિયાત નોંધણી કરાવવી પડશે. દરેક પશુ પર રેડિયો તરંગ આધારિત ઓળખ ચિપ (રેડિયો ફ્રીક્વન્સી આઇડેન્ટિફિકેશન) અને કાન પર પટ્ટી લગાવવાના રહેશે, જેથી પશુ કયા માલિકનું છે તેની તુરંત ઓળખ થઈ શકે. આ ઉપરાંત, જો કોઈ પશુની માલિકીમાં ફેરફાર થાય, તેનું વેચાણ થાય કે પશુનું મૃત્યુ થાય, તો તેની સત્તાવાર જાણ મહાનગરપાલિકાને કરવી કાયદાકીય રીતે ફરજિયાત રહેશે.
જાહેર રસ્તા પર ઘાસચારાના વેચાણ અને પશુઓને નીરવા પર સંપૂર્ણ પ્રતિબંધ
પશુઓ રસ્તા પર એકઠા ન થાય અને વાહનચાલકોને અડચણ ન ઊભી થાય તે માટે આ જાહેરનામામાં અન્ય એક અત્યંત મહત્વનો નિર્ણય લેવાયો છે. અમદાવાદ શહેરના જાહેર રસ્તાઓ કે ફૂટપાથ પર ઘાસચારાનું વેચાણ કરવા પર અને જાહેરમાં પશુઓને ઘાસ નાખવા પર સંપૂર્ણ પ્રતિબંધ લાદી દેવામાં આવ્યો છે. આ નિયમનો ભંગ કરનારા ચારો વેચનારા અને ચારો નાખનારા લોકો સામે પણ પોલીસ કાયદેસરના પગલાં ભરશે.
અહેવાલ: ગાંધીનગર પ્રવાસી પત્રકાર રાજેશ પરીખ
About the Author
