મુખ્ય હાઇલાઇટ્સ:
- તકલાદી કામગીરી ખુલ્લી પડી: સુરેન્દ્રનગર જિલ્લામાં કરોડોના ખર્ચે કેનાલ સફાઈ અને સમારકામમાં મોટાપાયે ભ્રષ્ટાચાર થયાની સાબિતી આપતી ઘટનાઓ સામે આવી.
- ખેડૂતોની મહેનત પાણીમાં: વઢવાણના મેમકા અને લખતરના અંકેવાળીયા પંથકમાં કેનાલ લીકેજ થતાં કપાસના મોંઘા બિયારણ વાવેલા ખેતરો બેટમાં ફેરવાયા.
- નિયમોનું સરેઆમ ઉલ્લંઘન: કચરો સાફ કર્યા વિના જ પાણી છોડી દેવાયું, જ્યારે ૧૦ દિવસ પહેલા બનેલી કેનાલના બેઝ અને દીવાલોના પોપડા ઉખડી ગયા.
- ઉચ્ચ સ્તરીય તપાસની માંગ: નર્મદા નિગમના મુખ્ય ઈજનેર રૂબરૂ મુલાકાત લઈ જવાબદાર કાર્યપાલક અને નાયબ ઈજનેર સામે આકરા પગલાં ભરે તેવી લોકમાંગ.
સુરેન્દ્રનગર:
સુરેન્દ્રનગર જિલ્લામાં સરકારી બાબુઓ અને કોન્ટ્રાક્ટરોની મિલીભગતને કારણે જગતના તાત પર મોટી આફત આવી પડી છે. જિલ્લામાં તંત્રની તકલાદી કામગીરીના કારણે વઢવાણ અને લખતર તાલુકામાં નર્મદાની કેનાલો સમારકામ કર્યાના ગણતરીના દિવસોમાં જ તૂટી પડી છે. કેનાલોમાં પાણી છોડાતાની સાથે જ મોટાપાયે પાણીનો વેડફાટ થઈને આજુબાજુના ખેતરોમાં ફરી વળ્યા છે. હાલ ચોમાસાની શરૂઆતમાં જ વાવણીનો કિંમતી સમય હોવાથી ખેડૂતો માટે હવે ખેતરોમાં વાવણી કેમ કરવી તે મોટો સવાલ ઊભો થયો છે. આ ઘટનાથી નર્મદા નિગમ દ્વારા કરવામાં આવેલા કેનાલ સફાઈ અને સમારકામના દાવાઓ પર ગંભીર સવાલો ઊભા થયા છે અને ભ્રષ્ટાચારની પોલ ખુલ્લી પડી ગઈ છે.
મેમકા સીમ વિસ્તારમાં અઠવાડિયામાં જ કેનાલ લીકેજ, દૂધરેજ પાસે કચરો જેમનો તેમ
સુરેન્દ્રનગર જિલ્લામાં થોડા સમય પહેલા જ મુખ્ય અને શાખા કેનાલોમાં સમારકામ અને સફાઈની કામગીરી હાથ ધરવામાં આવી હતી, જેના માટે કેનાલોમાં પાણીનો પ્રવાહ બંધ કરાયો હતો. આ કામ પૂર્ણ થયા બાદ હાલમાં જ સિંચાઈ અને પીવા માટે ફરીથી પાણી છોડવામાં આવ્યું છે. પરંતુ તંત્રની લાલિયાવાડી જુઓ કે સુરેન્દ્રનગરના દૂધરેજ પાસેથી પસાર થતી કેનાલમાં કચરો સાફ કર્યા વગર જ પાણી છોડી દેવાયું હોવાનું સામે આવ્યું છે. બીજી તરફ, વઢવાણ ગ્રામ્યના મેમકા પાસે આવેલી નાની કેનાલમાં સમારકામ થયાના માત્ર એક જ અઠવાડિયામાં મોટી તિરાડો પડી ગઈ હતી. બુધવારે સવારે આ કેનાલમાંથી પાણી વહેવાનું શરૂ થતાં જ ગાડા માર્ગો અને આસપાસના સીમ વિસ્તારોના ખેતરો પાણીથી ભરાઈ ગયા હતા, જેનાથી વાવેતરની તૈયારી કરતા ખેડૂતો નવી મુસીબતમાં મુકાયા છે.
લખતરના અંકેવાળીયા પાસે ૧૦ દિવસ પહેલા બનેલી કેનાલમાં પડ્યું મોટું ગાબડું
આવી જ ગંભીર સ્થિતિ લખતર તાલુકાના અંકેવાળીયા ગામ પાસેથી પસાર થતી નર્મદાની ડી-૬ કેનાલમાં પણ જોવા મળી છે. અહીં હજુ માંડ ૧૦ દિવસ પહેલા જ લાખોના ખર્ચે સમારકામની કામગીરી પૂરી કરવામાં આવી હતી. આ કામગીરી રવીદાસ એન્ડ કંપની દ્વારા કરાઈ હોવાનું બહાર આવ્યું છે. કેનાલમાં પાણી છોડવામાં આવતાની સાથે જ તેનો નીચેનો મુખ્ય ભાગ (બેઝ) તૂટી પડ્યો હતો અને મોટું ગાબડું પડ્યું હતું. કેનાલના બેઝની સાથે સાથે તેની દીવાલોમાં પણ ભયંકર તિરાડો પડી ગઈ હતી અને સિમેન્ટના પોપડા ઉખડીને નીચે પડી ગયા હતા. આ તૂટેલી કેનાલના પાણી પણ આજુબાજુના ખેતરોમાં દરિયાની જેમ ફરી વળ્યા હતા.
મોંઘા ભાવનું બિયારણ ફેલ થવાની ભીતિ, ઉચ્ચ અધિકારીઓ સામે પગલાં ભરવા માંગ
વર્તમાન સમય વાવણી માટે ઉત્તમ હોવાથી આ પંથકના ખેડૂતોએ દેવું કરીને પણ મોંઘા ભાવનું બિયારણ લાવીને કપાસનું આગોતરું વાવેતર કરી દીધું હતું. હવે ખેતરોમાં કેનાલના ગંદા અને વધુ પડતા પાણી ભરાઈ જવાના કારણે વાવેલું કિંમતી બિયારણ સંપૂર્ણપણે સડી જવાની અને નિષ્ફળ જવાની ભીતિ સેવાઈ રહી છે. ખેડૂતોનો આક્રોશ જોઈને હવે સ્થાનિક લોકોમાં એવી ઉગ્ર માંગ ઊભી થઈ છે કે નર્મદા નિગમના જવાબદાર મુખ્ય ઈજનેર (ચીફ એન્જિનિયર) પોતે આ આપત્તિજનક વિસ્તારની રૂબરૂ મુલાકાત લે અને સ્થાનિક જવાબદાર કાર્યપાલક ઈજનેર તેમજ નાયબ ઈજનેર (ડેપ્યુટી એન્જિનિયર) પાસેથી ખુલાસો મેળવી આ નબળા કામની તટસ્થ તપાસ કરાવે અને ભ્રષ્ટ કોન્ટ્રાક્ટરને કડક સજા કરે.
ગાંધીનગર પ્રવાસી પત્રકાર રાજેશ પરીખ
About the Author
