મુખ્ય હાઇલાઇટ્સ:
લોક આક્રોશ: મોટી દુર્ઘટના સર્જાય તે પહેલા તંત્ર દ્વારા તાત્કાલિક રીપેરીંગની માંગ.
જર્જરિત માળખું: પુલ પર મસમોટા ખાડા અને સ્લેબમાંથી લોખંડના સળિયા બહાર આવી ગયા છે.
મુખ્ય કડી: લીંબડી, રાણપુર, ધંધુકા અને ભાવનગરને જોડતો એકમાત્ર મુખ્ય માર્ગ.
ભારે વાહનોનો અતિરેક: ઓવરલોડ ડમ્પરોની અવરજવરથી પુલની મજબૂતી પર મોટું જોખમ.
લીંબડી: લીંબડી, રાણપુર, ધંધુકા અને ભાવનગરને જોડતા મુખ્ય માર્ગ પર આવેલો ‘ઉટડીનો પુલ’ હાલમાં અત્યંત બિસ્માર અને જર્જરિત હાલતમાં ફેરવાઈ ગયો છે. પુલની સપાટી પર મોટા ખાડાઓ પડી ગયા છે અને સ્લેબમાંથી લોખંડના સળિયા બહાર આવી જતાં આ માર્ગેથી પસાર થતા વાહનચાલકોમાં ભારે ફફડાટ ફેલાયો છે. જીવના જોખમે પસાર થતા વાહનચાલકો અને સ્થાનિક રહીશોમાં તંત્રની લાપરવાહી સામે ઉગ્ર રોષ જોવા મળી રહ્યો છે.
ઓવરલોડ ડમ્પરોથી જોખમમાં વધારો
આ પુલ બોટાદ અને ભાવનગર જિલ્લાના અનેક ગ્રામ્ય વિસ્તારોને જોડતી મુખ્ય કડી સમાન છે. આ માર્ગ પરથી દિવસ-રાત એસ.ટી. બસો અને નાના-મોટા વાહનોની અવરજવર રહે છે, પરંતુ સૌથી મોટું જોખમ પથ્થરો ભરેલા ઓવરલોડ ડમ્પરોના કારણે છે. સતત પસાર થતા ભારે વાહનોના વજનને કારણે પુલની સ્થિતિ વધુ ગંભીર બની રહી છે, જેના લીધે વાહનોને પણ નુકસાન થઈ રહ્યું છે અને અકસ્માતની ભીતિ સતત તોળાઈ રહી છે.
દુર્ઘટના પહેલા જાગે તંત્રની ઊંઘ
તાજેતરમાં રાજ્યમાં બનેલી કેટલીક પુલ હોનારતોને યાદ કરીને સ્થાનિક લોકોમાં ભારે દહેશત જોવા મળી રહી છે. લોકોનું કહેવું છે કે, જો કોઈ મોટી જાનહાનિ કે દુર્ઘટના સર્જાશે તો તેની સંપૂર્ણ જવાબદારી સરકારી તંત્રની રહેશે. રોષે ભરાયેલા ગ્રામજનોએ ચીમકી ઉચ્ચારી છે કે, તંત્ર વહેલી તકે આ પુલનું ટેકનિકલ સર્વેક્ષણ કરાવે અને યુદ્ધના ધોરણે મરામત કામગીરી શરૂ કરવામાં આવે, જેથી નિર્દોષ મુસાફરોનો જીવ જોખમમાં મુકાતો અટકે.
અહેવાલ:રાજેશ પરીખ, ગાંધીનગર પ્રવાસી પત્રકાર
About the Author
