📌 ગીર સિંહ લાઈવ અપડેટ્સ: મુખ્ય મહત્વના મુદ્દાઓ
-
મોતનો આંકડો: છેલ્લા ૧૦ દિવસમાં ગીરના અલગ-અલગ વિસ્તારોમાં ૫ સિંહ અને ૩ સિંહબાળ સહિત કુલ ૮ વનરાજોના મોત.
-
રોગની આશંકા: વન્યજીવોના લોહીના કણો પર હુમલો કરતા ઘાતક ‘બબેસિઓસિસ’ બીમારીના કારણે મોત થયાનું પ્રાથમિક તારણ.
-
ગ્રાઉન્ડ ઝીરો પર તપાસ: ગાંધીનગર પીસીસીએફ જયપાલસિંહના આદેશથી વેટરનરી ડૉક્ટરોની સ્પેશિયલ ટીમ ગીરમાં તૈનાત.
-
ધારી ગીર પૂર્વ સેફ: ડીસીએફ વિકાસ યાદવના મતે ધારી ગીર પૂર્વમાં સ્થિતિ સંપૂર્ણ કાબૂમાં, કોઈ સિંહનું મોત નથી થયું પણ ૩૫૦ સિંહોનું સ્ક્રીનિંગ કરાયું.
-
ભૂતકાળનો ભય: વર્ષ ૨૦૧૮ (દલખાણીયા રેન્જ) અને ૨૦૨૦માં ખાંભા-ધારી પંથકમાં આ જ રોગે સિંહોનો ભોગ લીધો હોવાથી વનપ્રેમીઓ ચિંતિત.
અમરેલી/સાસણ ગીર: એશિયાટિક સિંહોના એકમાત્ર આશ્રયસ્થાન ગણાતા પવિત્ર અને ઐતિહાસિક ગીરના જંગલમાંથી વન્યજીવ પ્રેમીઓ અને પર્યાવરણવિદો માટે અત્યંત ચિંતાજનક અને ચોંકાવનારા સમાચાર સામે આવ્યા છે. ગીર પશ્ચિમ અને અમરેલીના જંગલ વિસ્તારોમાં ૫ સિંહ તથા ધારી ગીર પૂર્વના ગીર ગઢડા સરહદ વિસ્તારમાં છેલ્લા માત્ર ૧૦ જ દિવસમાં વધુ ૩ માસૂમ સિંહબાળના મોત થતાં વનવિભાગના ઉચ્ચ અધિકારીઓથી લઈને સ્થાનિક સ્ટાફમાં ભારે દોડધામ મચી ગઈ છે. ગાંધીનગર સ્થિત પ્રિન્સિપાલ ચીફ કન્ઝર્વેટર ઓફ ફોરેસ્ટ (PCCF) જયપાલસિંહે આ સમગ્ર ગંભીર મામલાની પુષ્ટિ કરી છે. પ્રાથમિક તપાસમાં આ તમામ મોતના મૂળમાં સિંહો માટે કાળ સાબિત થતો ‘બબેસિઓસિસ’ (Babesiosis) નામનો જીવલેણ પ્રોટોઝોઆ જન્ય રોગચાળો હોવાની પ્રબળ આશંકા સેવાઈ રહી છે.
ભૂતકાળના કાળમુખા ઇતિહાસથી વનવિભાગ ચિંતિત: ગાંધીનગરથી પ્રિ.સી.સી.એફ. જયપાલસિંહે સિંહોના સ્વાસ્થ્ય અંગે વધુ વિગતો આપતા જણાવ્યું છે કે, આ લોહીના કણોને તોડી નાખતા ઘાતક રોગચાળાના કારણે અગાઉ પણ અલગ-અલગ વિસ્તારોમાં બે સિંહબાળના મોત નીપજ્યા હતા. ગીરના જંગલમાં સિંહોમાં આ પ્રકારે ચેપી રોગચાળો ફેલાવો એ વનવિભાગ માટે સૌથી મોટો ચિંતાનો વિષય છે, કારણ કે ભૂતકાળમાં પણ આ જ વાયરસ-રોગચાળો સિંહો માટે ભારે તબાહી લાવી ચૂક્યો છે. યાદ અપાવી દઈએ કે, વર્ષ ૨૦૧૮માં ગીરની દલખાણીયા રેન્જમાં જ્યારે બબેસિઓસિસ અને સીડીવી ફેલાયો હતો, ત્યારે અસંખ્ય વનરાજોના ટપોટપ મોત થયા હતા. ત્યારબાદ વર્ષ ૨૦૨૦-૨૦૨૧માં ધારી અને ખાંભા ગીર વિસ્તારમાં પણ આ જ જીવલેણ ઇન્ફેક્શનના કારણે અનેક સિંહો કાળનો કોળિયો બન્યા હતા.
વનવિભાગ એક્શન મોડમાં: ૩૫૦ સિંહોનું હેલ્થ સ્કેનિંગ: આ ભયાનક ખતરાને જોતા વનવિભાગ તાત્કાલિક ધોરણે સુપર એલર્ટ મોડ પર આવી ગયું છે. વનવિભાગની ખાસ વેટરનરી ડૉક્ટર્સ અને ટ્રેકર્સની ટીમો દ્વારા જંગલના પ્રભાવિત વિસ્તારોમાં સિંહોના લોકેશન મેળવી રાઉન્ડ ધ ક્લોક (૨૪ કલાક) મોનિટરિંગ અને ટ્રેકિંગ શરૂ કરી દેવામાં આવ્યું છે. બીજી તરફ, ધારી ગીર પૂર્વના ડીસીએફ (DCF) વિકાસ યાદવના જણાવ્યાનુસાર, અમરેલી જિલ્લાના ધારી ગીર પૂર્વના અંદરના વિસ્તારમાં આ ચાલુ સિઝન દરમિયાન સદનસીબે એકપણ સિંહનું મોત થયું નથી. પરંતુ, અગમચેતીના ભાગરૂપે વનવિભાગે આ વિસ્તારના આશરે ૩૫૦ જેટલા સિંહોનું સઘન નિરીક્ષણ, તપાસ અને હેલ્થ સ્ક્રીનિંગ પૂર્ણ કરી લીધું છે, જેથી જો કોઈ સિંહમાં બીમારીના લક્ષણો દેખાય તો તેને તાત્કાલિક આઇસોલેટ કરી સારવાર આપી શકાય. હાલ વનવિભાગના ઉચ્ચ અધિકારીઓ ગીરના પ્રભાવિત જંગલ વિસ્તારોમાં જ કેમ્પ કરીને સિંહોની પળેપળની સ્થિતિ પર કડક નજર રાખી રહ્યા છે.
About the Author
